Генеральны сакратар ААН Пан Гі Мун вылучыў сваю кандыдатуру на другі тэрмін
Аб намеры зноў пазмагацца за пасаду кіраўніка галоўнай міжнароднай арганізацыі Пан Гі Мун заявіў у панядзелак на прэс-канферэнцыі ў Нью-Ёрку.
Цяперашні тэрмін паўнамоцтваў Пан Гі Муна як генеральнага сакратара ААН заканчваецца 31 снежня. Аб іншых кандыдатах на гэты пост пакуль не паведамляецца. Яшчэ ў сакавіку Пан Гі Муна запэўнівалі ў падтрымцы прадстаўнікі ЗША і іншых ключавых краін-членаў Савета Бяспекі ААН, што робіць яго перавыбранне больш чым верагодным.
Афіцыйна генеральныя сакратары ААН абіраюцца па рэкамендацыі Савета Бяспекі Генеральнай асамблеяй ААН, у якой прадстаўлены 192 дзяржавы. Фактычна ж яго абіраюць толькі пяць членаў Савета бяспекі, якія маюць права вета - Вялікабрытанія, Кітай, Расія, Францыя і ЗША, паведамляе РИА Новости.
