Хто і колькі зарабляе ў Беларусі (+табліца самых бедных раёнаў)

25/01/2013 - 15:08

Белстат “падбіў грошы” за снежань 2012 года. Сярэдні заробак па краіне склаў амаль 550 долараў — гэта 4 мільёны 741 тысяча рублёў. Карыстаючыся звесткамі з сайта статыстычнага ведамства, Еўрарадыё размеркавала працу беларусаў па заробках: ад самай таннай да самай высокааплатнай:

Сярэднія заробкі за снежань 2012 года:

Сярэдні заробак за снежань 2012 года	Род дзейнасці, прафесія
<3 мільёнаў рублёў	Сацыяльныя паслугі (2,745 млн.)
3-3,5 мільёна рублёў	Сельская гаспадарка, паляванне (3,324 млн.), жывёлагадоўля (3,394 млн.), лясная гаспадарка (3,396 млн.), рамонт бытавых вырабаў і прадметаў асабістага карыстання (3,403 млн.)
3,5-4 мільёны рублёў	Медыцынскі персанал (3,594 млн.), настаўнікі (3,671 млн.), тэкстыльная і швейная вытворчасць (3,727 млн.), дрэваапрацоўка (3,953 млн..), водны транспарт (3,955 млн.)
4-4,5 мільёна рублёў	Вытворчасць абутку (4,003 млн.), вытворчасць апаратуры для радыё і TV (4,301 млн.)
4,5-5 мільёнаў рублёў	Здабыча вугалю (4,846 млн.)
5-5,5 мільёна рублёў	Страхаванне (5,213 млн.), харчовая вытворчасць (5,242 млн.), будоўля (5,567 млн.)
5,5-6 мільёна рублёў	Выдавецкая дзейнасць (5,766 млн.), вытворчасць аўтамабіляў (5,845 млн.)
6-6,5 мільёна рублёў	Чыгуначнікі (6,021 млн.), дактары (6,027 млн.), выкладчыкі ВНУ (6,377 млн.)
6,5-7 мільёнаў рублёў	Радыёвяшчанне і тэлебачанне (6,979 млн.)
7-7,5 мільёна рублёў	Здабыча паліўна-энергетычных карысных выкапняў (7,236 млн.), хімічная вытворчасць (7,334 млн.)
7,5-8 мільёнаў рублёў	-
>8 мільёнаў рублёў	Паветраны транспарт (9,258 млн.), нафтавая вытворчасць (10,030 млн.), фінансавае пасрэдніцтва (10,342 млн.), праграмісты (13,608 млн.)

Менш за ўсё — 320 долараў — у Беларусі плацяць за сацыяльныя паслугі. Гэта адзіная сфера дзейнасці, сярэдні заробак у якой складае сёння менш за 3 мільёны рублёў.

На 600 тысяч больш зарабляюць калгаснікі і паляўнічыя. У адной абойме з імі жывёлаводы, егеры і майстры з Дамоў быту. Усе яны зарабляюць каля 400 долараў.

Настаўнікі і медперсанал атрымліваюць амаль пароўну: у сярэднім — у раёне 420 долараў. Пры гэтым яшчэ ў лістападзе сярэдні заробак у лякарнях быў на 340 тысяч ніжэйшы! Побач з імі “прыгонныя” рабочыя дрэваапрацоўчых прадпрыемстваў. На хвалі мадэрнізацыі іх снежаньскі заробак узняўся амаль да 460 долараў.

Самы блізкі да сярэдняга па краіне заробак атрымліваюць у вугальнай прамысловасці. За здабычу вугалю, лігніту і торфу ў Беларусі ў сярэднім плацяць 4,8 мільёна рублёў ($560).

Заробак, вышэйшы за сярэдні, атрымліваюць транспартнікі, нафтавікі, прафесура. Усіх не пералічыць. А рэкардсменамі — з вялікім адрывам — па-ранейшаму застаюцца праграмісты, якія з лістапада прыбавілі больш за 3 мільёны рублёў! Параўнайце 10 мільёнаў 392 тысячы сярэдняга заробку за лістапад і 13 мільёнаў 608 тысяч за снежань.

IT-сферу ў статыстычным ведамстве дагэтуль называюць “дзейнасць, звязаная з вылічальнай тэхнікай”. Але вылічальная тэхніка — гэта і касавы апарат, і звычайны калькулятар! Сярэдні заробак тут самы высокі: 13,6 мільёна рублёў. Касіры пра такі нават не мараць!

Таксама Белстат паведамляе сярэднія заробкі за студзень-лістапад 2012 года па беларускіх рэгіёнах. Танней за ўсё цягам мінулага года праца каштавала ў Браслаўскім раёне. Сярэдні заробак — 2 мільёны 508 тысяч рублёў. Сярэдні заробак ніжэйшы за 300 долараў атрымлівалі ў студзені-лістападзе 2012 года ў 13 раёнах Беларусі.

10 самых бедных раёнаў Беларусі, студзень-лістапад 2012 года:

Раён	Сярэдні заробак (у тысячах рублёў)
Браслаўскі	2 508,3
Кармянскі	2 523,0
Лоеўскі	2 529,6
Шумілінскі	2 532,6
Краснапольскі	2 534,9
Мсціслаўскі	2 535,2
Слаўгарадскі	2 537,8
Столінскі	2 561,0
Хоцімскі	2 568,2
Шаркоўшчынскі	2 575,4

Самы багаты раён Беларусі — Мінскі, там са студзеня па лістапад 2012 года зараблялі ў сярэднім 4,3 мільёны рублёў. Амаль на 200 тысяч меншыя заробкі ў Жлобінскім і Рэчыцкім раёнах.

А горадам-марай з самымі высокімі сярэднімі заробкамі ў 2012 годзе была зусім не сталіца, а… Наваполацк: амаль 4,8 мільёна рублёў! І ўжо за ім ідуць Мінск і Жодзіна.

Фота: "Народныя навіны Віцебска".