Кантрабандысты збілі памежніка і адабралі ў яго тэлефон
Праз мяжу спрабавалі пераправіць адзёжы на 1 мільярд рублёў. Баулы з кантрабандай знойдзеныя, нахабныя кантрабандысты ― не.
Здарэнне адбылося ў Кобрынскім раёне. Памежнікі заўважылі мікрааўтобус Volkswagen без нумароў і пачалі яго пераслед. У вёсцы Павіцце бус нечакана спыніўся і перакрыў дарогу машыне памежнай службы.
Двое невядомых мужчын, што выйшлі з іншамаркі, выцягнулі з машыны памежніка, збілі яго і адабралі мабільны тэлефон. А пасля з'ехалі ў кірунку паромнай пераправы Драгічынскага раёна.
Начынне буса ― 93 баула з адзёжай коштам больш за 1 мільярд рублёў ― раззлаваныя памежнікі знайшлі праз некалькі гадзінаў, распавядае тэлеканал “Вараг”. А вось знайсці нахабных кантрабандыстаў пакуль не атрымліваецца.
