Хосні Мубарака прыгаварылі да пажыццёвага зняволення
Былога прэзідэнта Егіпта прызналі вінаватым у гібелі дэманстрантаў, якія праводзілі акцыі пратэсту.
Такі ж самы прысуд атрымаў і былы міністр унутраных справаў Хабіба аль-Адлі.
Як паведамляе Associated Press, пасля абвяшчэння прысуду былому прэзідэнту ў залі прагучалі выкрыкі з патрабаваннямі пакараць Мубарака смерцю. Затым завязалася бойка і пасля гэтага асуджаных хутка вывелі з залі.
Хосні Мубарак прысутнічаў пры вынясенні прысуду. Палітыку нядаўна споўнілася 84 гады. У суд яго даставілі на верталёце з турэмнай лякарні і ўвезлі ў залю на інвалідным вазку. Сваё пакаранне Мубарак будзе адбываць у лякарні турмы Тора пад Каірам.
Пры ўладзе ён знаходзіўся амаль 30 год.
