Кітайскі тэхнапарк ці Парк высокіх тэхналогій: у каго льготы смачней?

120619 Savi4 Padatki.mp3

Падатковыя льготы для кітайскага тэхнапарку — гэта “калі сюзерэн даруе сваім васалам нейкія паслабленні”, кажа Сяргей Чалы.

“Без стварэння такіх ільготаў не было б логікі стварэння Кітайска-беларускага парка, — кажа старшыня галоўнага ўпраўлення інвестыцый Мінэканомікі Кірыл Карацееў. — Так, бюджэт недаатрымае некаторыя грошы, але амаль што ўся тэрыторыя ў Беларусі падпадае пад свабодныя эканамічныя зоны са сваімі асаблівасцямі”.

Свабодныя эканамічныя зоны сапраўды маюць шэраг падатковых палёгак. Але такіх, як “кітайскія”, няма нават у Парка высокіх тэхналогій (гл. табліцу).

Лічыце самі! Рэзідэнты тэхнапарку пад Смалявічамі пазбаўляюцца ад трох найбольш важных падаткаў для кожнага прадпрыемства на тэрыторыі Беларусі: падатак на зямлю, маёмасць і прыбытак. Першае дзесяцігоддзе рэзідэнты Кітайскага тэхнапарку не плацяць дзяржаве анічога. Наступныя дзесяць гадоў — толькі палову. Да таго ж, смалявіцкім уладам параілі вызваліць сумесную кітайскую кампанію ад выплаты мясцовых падаткаў. Указ абараняе “кітайцаў” і ад увядзення новых падаткаў. Адным словам, кітайскі парк ў шакаладзе — амаль ніякіх збораў.

На другім месцы “па льготах” — Парк высокіх тэхналогій. (гл. табліцу). Тут зноў жа — няма падатку на прыбытак, на маёмасць, зямельны падатак можна не сплачваць першыя тры гады існавання кампаніі. Дарэчы, ў IT-парку ёсць палёгкі ў галіне падаткаў на прыбытак — рэзідэнты парку яго не выплачваюць увогуле, “кітайскі тэхнапарк” — амаль не мае, а вось ў свабоднай эканамічнай зоны “Мінск” ільготы амаль што пажыццёвыя — пасля пяці гадоў абвяшчэння прыбытку рэзідэнты нічога не плацяць, а потым таксама толькі палову.

Паводле падлікаў Еўрарадыё, менш за ўсё льгот — для рэзідэнтаў свабоднай эканамічнай зоны “Мінск”. СЭЗ вызвалена ад зямельных падаткаў і ад падаткаў на прыбытак ў першыя пяць гадоў пасля аб’яўлення кампаніі даходнай. Пасля гэтага рэзідэнты сплачваюць толькі 50 % ад стаўкі, сёння гэта 9%.

Льготы для звычайных людзей — толькі ў “парках”. Супрацоўнікі Кітайскага парку і ПВТ сплачваюць 9% падатку. Аднак, нягледзячы на ўсё гэта, у адміністрацыі СЭЗ Мінск не хвалююцца, што інвестары перабягуць да кітайцаў:

“Нам не хапае тэрыторый, каб размясціць усіх жадаючых. А што рэзідэнты пойдуць да кітайцаў — нас не палохае. Ці будзе яшчэ гэты парк? Дай Бог, каб такая махіна запрацавала”, — кажа намеснік старшыні адміністрацыі СЭЗ “Мінск” Марына Адамовіч.

Не баіцца льгот будучага кітайскага “цмоку” і IT-парк. Таму што рэзідэнты ПВТ могуць дзейнічаць дзе заўгодна на тэрыторыі Беларусі, у той час як Кітайскі тэхнапарк — толькі ў Смалявічах.

“У Кітайска-беларускім тэхнапарку жорстка агавораны тэрытарыяльны прынцып: дзейнічаць можна толькі ў раёне Смалявічаў, а нашы рэзідэнты могуць дзейнічаць дзе заўгодна. Канкурэнтаў не баімся”, — кажуць Еўрарадыё ў адміністрацыі Парку высокіх тэхналогій.

Эканаміст Сяргей Чалы лічыць, што стварэнне свабодных эканамічных зон з такімі льготамі — не інакш як нахабства.

“З аднаго боку — мы маем свабоду перамяшчэння капіталаў, рабочай сілы, а з другога боку — спадзяемся на тое, што нашы партнёры па Адзінай эканамічнай прасторы закрыюць вочы на дзірку ў заканадаўстве. Правам прызнаваць рэзідэнтам будзе валодаць створаная рэзідэнцыя, таму, як заўсёды, чыноўнікі, якія раздаюць палёгкі — яны для сябе гэтыя законы і пішуць, каб была магчымасць камусьці даць ільготы, а камусьці не даць. Гэта змахвае на феадальную сістэму, калі сюзерэн даруе сваім васалам нейкія льготы. У нас і раней былі такія льготы, але раней мы не даходзілі да такога нахабства, каб на 50 гадоў усё прапісаць”, — кажа эканаміст.

Табліца. Падатковыя льготы і зборы для рэзідэнтаў Кітайска-беларускага тэхнапарку, Парку высокіх тэхналогій, свабоднай эканамічнай зоны “Мінск”.

Фота: moneyball.info