Кітайцаў у Беларусі стала больш у 20 разоў, а беларусаў менш на паўмільёна

За 10 гадоў беларусаў стала менш на 541 тысячу чалавек. Цяпер у нашай краіне жыве 9,5 мільёнаў чалавек 140 нацыянальнасцяў. 84 працэнты з іх беларусы, 8% рускія, 3% палякі, 2% украінцы, 0,1% яўрэі, а таксама 1355 казахаў, 66 ліцвінаў, 23 японцы, 17 шведаў, 2 ціндынцы (малы народ заходняга Дагестана), адзін рутулец і сібірскі татарын.

Дарэчы, размеркаванне нацыянальнасцяў па абласцях адрозніваецца. Так, напрыклад, на Гарадзеншчыне амаль кожны чацвёрты – паляк.

Адзначым, што рускіх і ўкраінцаў стала на траціну менш, а вось кітайцаў, якія стала пражываюць у Беларусі, пабольшала ў 20 разоў.

Найбольш насельніцтва скарацілася ў Віцебскай, Мінскай і Магілёўскай абласцях. А вось жыхароў Мінска наадварот стала больш на 156 тысяч. Цяпер у сталіцы жыве 1 мільён 837 тысяч чалавек. 

Скарачаецца насельніцтва толькі ў вёсцы, гараджанаў становіцца толькі больш. Расце і сама колькасць гарадоў, цяпер іх на 8 больш, а ў 13 гарадах краіны жыве не менш за 100 тысяч чалавек. 

Як адзначыла намесніца кіраўніка Нацыянальнага статыстычнага камітэта Алена Кухарэвіч, беларусы, як і астатнія еўрапейцы, старэюць.

Беларуская мова родная для 60% насельніцтва Беларусі. Пры тым карыстаецца ёй толькі кожны чацвёрты. Асноўнай жа мовай насельніцтва з'яўляецца руская, на ёй гаворыць больш за 6,5 мільёнаў беларусаў. Адзначым, што 10 гадоў таму дома па-беларуску размаўляла амаль 37% жыхароў краіны, а роднай "мова" была для 85,6% беларусаў.

Свабодна валодае англійскай мовай толькі адзін чалавек з 21, нямецкай – 138 тысяч чалавек. У параўнанні з 1999-м годам гэтыя лічбы выраслі у 3 разы.

Адукаванасць беларусаў у параўнанні з 1999-м годам павялічылася на 5 працэнтаў. Цяпер 90% людзей старэйшых за 15 гадоў маюць мінімум базавую адукацыю. Зусім неадукаваных па-ранейшаму застаецца 0,4 працэнты. Вышэйшую адукацыю мае кожны шосты.

У 11% беларусаў дзве крыніцы даходаў, на адзін заробак жыве 86% краіны, а больш за 23% вісіць у кагосьці на шыі, у асноўным гэта моладзь да 20 год. Сярод працаздольных людзей працуе 70 працэнтаў.

Знізіўся інтарэс моладзі і да афіцыйнага шлюбу. Пабраныя шлюбам толькі 62 працэнты мужчын і 52 жанчын старэйшых за 15 год. А вось колькасць людзей, якія жывуць разам, але не распісаныя, павялічылася з 5 да 8 працэнтаў, у асноўным гэта моладзь 18-24 год.

На 1000 мужчын сёння ў Беларусі 1150 жанчын, але ў вёсцы жанчын наадварот не хапае.

Увогуле смяротнасць мужчын узрасла, таму павялічылася колькасць удоў, іх больш за 810 тысяч.