Лукашэнка пажадаў Пуціну “невычарпальнай энергіі” і “стваральных поспехаў”
Беларускі кіраўнік павіншаваў расійскага калегу з 60-годдзем.
“Беларусы ведаюць вас і цэняць як шчырага перакананага прыхільніка ўмацавання сапраўды братэрскіх сувязяў паміж нашымі краінамі, — цытуе тэкст віншавання агенцтва БЕЛТА. — У значнай ступені дзякуючы Вашым высілкам новае дыханне дадзена беларуска-расійскаму стратэгічнаму партнёрству, істотна актывізаваная сумесная праца па развіцці Мытнага саюза і Адзінай эканамічнай прасторы, бачныя абрысы набываюць наймаштабнейшыя праекты далейшай інтэграцыі з удзелам Беларусі і Расіі”.
“Перакананы, што ваш багаты досвед, жыццёвая мудрасць, прынцыповасць і добрае стаўленне да Беларусі будуць і ў далейшым спрыяць узаемавыгаднаму супрацоўніцтву нашых дзяржаў і ўмацаванню сяброўства паміж беларусамі і расіянамі”, — гаворыцца ў віншаванні.
Аляксандр Лукашэнка пажадаў Уладзіміру Пуціну невычарпальнай энергіі, моцнага здароўя і стваральных поспехаў у яго мнагатруднай і адказнай дзейнасці на дабрабыт Расійскай Федэрацыі.
