Першы трэнер Бокія: У Бабруйску няма басейна, каб трэніраваць дзяцей

06/12/2012 - 15:09

Герой лонданскіх Гульняў Ігар Бокій (пяць залатых медалёў і адно срэбра) пачынаў займацца плаваннем у бабруйскім “жабніку” (неглыбокім басейне для дзяцей).

“У нас зараз стаіць прыгожы сабор у цэнтры горада. У савецкія часы храм быў перароблены ў басейн, — паглыбляецца ў гісторыю Наталля Пазднякова, першы трэнер Ігара Бокія. — Там быў трохдарожачны басейн і "жабнік" для пачатковага навучання дзяцей. Гэта правільна, што сабор вярнулі. Але абяцалі, што новы “жабнік” для дзяцей будзе збудаваны. Гэтага не зрабілі, і дзяцей сёння праглядаць і вучыць няма дзе”.

Зараз басейн для дзяцей месціцца ў Бабруйску па вуліцы Астроўскага. Праўда, называць гэтую ўстанову спартыўным аб’ектам некарэктна: хутчэй выглядае ён як забаўляльная купель у лазневым комплексе.

Нагадаем, што пасля сенсацыйнага выступу на Паралімпіядзе Ігар Бокій вырашыў перайсці ў плаванне сярод здаровых, прабіцца на Гульні 2016-га года. Але пакуль трэніравацца на поўную моц спартсмен не можа. З Мінска ён нечакана перабраўся назад у Бабруйск, і займаецца ў басейне санаторна-курортнага комплексу “Шыннік”, які не адпавядае сучасным патрабаванням.

Аказалася, Бокію ў Мінску не выдалі кватэру. Увага! Жыллё абяцалі не падарыць, а ўсяго толькі даць у часовае карыстанне да наступнай Алімпіяды. Той-сёй чыста па-беларуску папракне, што за паралімпійскія медалі Ігар атрымаў немалы ганарар. Але як скарыстацца грашыма — асабістая справа плыўца. А вось належныя ўмовы для трэніровак такім топавым спартсменам, па ідэі, павінны арганізоўваць.

“Кажуць, праблемы нейкія, і пакуль не могуць даць службовую кватэру, хоць абяцалі даўно, — тлумачыць Ігар, чаму вярнуўся ў Бабруйск. — Таму мне мой трэнер з Мінска перасылае праграму, а мой першы трэнер, Наталля Юр’еўна, сочыць за яе выкананнем”.

Цікавімся ў Наталлі Паздняковай, ці магчыма падтрымліваць належную форму і расці ў бабруйскім басейне.

Наталля Пазднякова: “Тут няма сучасных стартавых тумбачак. Няма належнага ўзроўню вады. То бок адпрацаваць старты і іншыя элементы — немагчыма. Тут правісаюць дарожкі. Так разумею, што з-за канструктыўных недахопаў цалкам наліць у басейн вады, каб ляжалі дарожкі, як належыць, немагчыма. Няма спецыяльных водных трэнажораў, якія неабходна спартсменам найвышэйшага класу, і г.д.”

Праца ў бабруйскім басейне комплекса “Шыннік” кіпіць штодня. Каманда трэнераў, як відаць, можа падрыхтаваць новых зорак у сваім відзе спорту. Але, як мы ўпэўніліся, не пры такіх умовах, якія сёння створаны для плавання ў Бабруйску.

“Басейн нам вельмі патрэбны”, — так сканчае гутарку трэнер Наталля Пазднякова.