Польскія лекары: беларускі хлопчык па-ранейшаму ў цяжкім стане
У Польшчы ў жахлівай аварыі загінулі трое беларусаў. Цудам засталося жывым толькі двухгадовае дзіця, якое выкінула з аўтамабіля.
Трагічнае здарэнне адбылося каля Лодзі. Аўтамабіль Subaru сутыкнуўся з бетонным дарожным раздзяляльнікам і загарэўся.
Хлопчык, Сямён К., быў шпіталізаваны са шматлікімі траўмамі. Вось што распавялі Еўрарадыё ў панядзелак раніцай у Цэнтры здароўя польскай маці ў Лодзі:
"Дзіця ў цяжкім стане. У яго цяжкая траўма галавы, траўма грудной клеткі. У яго прагрэсіруючая артэрыяльная гіпатэнзія, нягледзячы на тое, што мы аказваем лячэнне, якое патрэбнае ў такіх выпадках".
Польская паліцыя мяркуе, што аварыя магла адбыцца з-за таго, што кіроўца заснуў за рулём.
