Еўрапарламент нечакана адклаў рэзалюцыю па Беларусі на канец месяца

Чаканае галасаванне па ўзгодненым усімі палітычнымі групамі праекце рэзалюцыі па Беларусі не адбылося. Крысціян Вігенін, старшыня Дэлегацыі Еўрапарламента па Еўранэсце, прапанаваў вярнуцца да пытання праз 2 тыдні.

Крысціян Вігенін: "Перанос прыняцця рэзалюцыі на наступную міні-пленарную сесію ў Брусэлі прапануецца па дзвюх асноўных прычынах: даць беларускім уладам час абдумаць і зрэагаваць на сітуацыю, і каб прагаласаваць па змененым тэксце рэзалюцыі ў святле хуткіх новых падзеяў".

Еўрадэпутат мае на ўвазе рашэнне Савета ЕС 23 сакавіка. Нагадаем, еўрапейскія міністры збіраюцца пашырыць "чорны спіс", у тым ліку дадаўшы туды новых бізнесменаў, калі да гэтага часу не вызваляць палітычных зняволеных. Беларускія ж улады абяцаюць жорстка адказаць на далейшае пашырэнне спісу.

Еўрадэпутат Марэк Мігальскі запярэчыў, што адмова ад прыняцця рэзалюцыі 15 сакавіка будзе расцэнена Мінскам як праява слабасці. А таму, асабліва ў святле адмовы Лукашэнкі памілаваць асуджаных Канавалава і Кавалёва (мінулая рэзалюцыя заклікала да памілавання), рэзалюцыю трэба прымаць неадкладна, заявіў Мігальскі. Аднак большасць еўрадэпутатаў пагадзіліся з прапановай аб пераносе.

Прыняцце рэзалюцыі чакаецца на пленарнай сесіі ў Брусэлі, якая пройдзе 28-29 сакавіка.