Святаром з Расонаў зацікавілася фінансавая міліцыя
Ксяндза Вячаслава Барка, які служыць у г.п. Расоны Віцебскай вобласці, 29 снежня выклікалі ў дэпартамент фінансавых расследаванняў ў Наваполацку.
Паводле слоў ксяндза Вячаслава, фінансавая міліцыя праводзіць расследаванне паводле ананімнай заявы, у якой сцвярджаецца, што святар займаецца незаконным турыстычным бізнесам і зарабіў на гэтым ад 350 тысяч да мільёна еўра.
Нагадаем, ксёндз Вячаслаў Барок займаецца арганізацыяй пілігрымак у святыні Еўропы і Палестыны. Экскурсіі заўсёды праводзяцца на беларускай мове і пакідаюць добрае ўражанне ва ўдзельнікаў. У іх прынялі ўдзел некалькі тысяч беларусаў. Ксёндз Вячаслаў таксама быў ініцыятарам пратэсту вернікаў супраць дзеянняў міліцыі падчас сёлетняга фэсту ў Будславе.
"Я не магу прагназаваць, які працяг будзе мець гэтая справа. Лепей было б, каб адпаведныя органы зацікавіліся не мною, а знайшлі таго правакатара, які напісаў заяву", — кажа ксёндз Вячаслаў.
