Ці падпішацца "Белая Русь" за альтэрнатыўных кандыдатаў?

На сустрэчы з кіраўніком сваёй ініцыятыўнай групы Аляксандр Лукашэнка звярнуўся да выбаршчыкаў з просьбай падтрымаць альтэрнатыўных кандыдатаў. "Трэба людзям патлумачыць, каб яны падтрымалі і тых. Гэта ж не галасаванне за прэзідэнта. Гэта выдача квітка на тое, каб ты далей прымаў удзел у прэзідэнцкіх выбарах. <...> Таму няхай людзі і іх падтрымаюць", — сказаў кіраўнік краіны.

Найперш і найлепш падтрымаць каго-небудзь з астатніх 14 вылучэнцаў па ініцыятыве прэзідэнта магло б грамадскае аб'яднанне "Белая Русь", 100 тысяч сяброў якога дружна падпісаліся за Аляксандра Лукашэнку.

"Сябры "Белай Русі" вызначылі фармат свайго ўдзелу ў выбарах яшчэ летась у снежні, падчас пасяджэння пашыранага прэзідыума, — распавёў прэс-сакратар аб'яднання Юрый Міронаў. — І сёлета, як і абяцалі, мы выканалі свой партыйны абавязак і падтрымалі кіраўніка дзяржавы. Гаворка нават не пра збор подпісаў, а менавіта пра тое, што кожны за сябе паставіў подпіс. І мы прадэкларавалі гэтыя 100 тысяч".

Натуральна, пасля просьбы прэзідэнта гэтак жа цэнтралізавана можна было б падпісацца і, напрыклад, за Рыгора Кастусёва ад Партыі БНФ. Але тут альтэрнатыўным кандыдатам не перападзе:

"Рашэння з гэтай нагоды "Белая Русь" не прымала. То бок, у нас быў прэзідыум, на якім і далёка гэтае пытанне не разглядалася. Таму падпісвацца ці не за альтэрнатыўных кандыдатаў — застаецца асабістай справай людзей. І я ўпэўнены, што такія людзі будуць — хаця б адзін, але хто-небудзь захоча падтрымаць каго-небудзь іншага", — дадаў Юрый Міронаў.

У рэгіёнах на просьбу прэзідэнта адрэагавалі з разуменнем.

"Прэзідэнт меў права на такую просьбу, — лічыць начальніца ідэалагічнага ўпраўлення Ўшацкага райвыканкама Вольга Захаранка. — Але мы, нават каб і захацелі, не можам самі падпісваць людзей за іншых асобаў, якія хочуць стаць кандыдатамі. Гэта могуць рабіць толькі сябры іх ініцыятыўных груп. Мы маглі б па просьбе прэзідэнта арганізаваць людзей, але трэба, каб быў хаця б адзін чалавек з пасведчаннем ініцыятыўнай групы іншага кандыдата. А дзе яны?! Нікога няма".

Сяргей Марозаў, які курыруе пытанні ідэалогіі ў Крычаўскім райвыканкаме, удзельнічаць у нашай апытанцы адмовіўся, ледзь пачуўшы, што яму тэлефануе Еўрарадыё. Затое нас добра ведаюць у Бярозе. Але ў працэс збору подпісаў мясцовая ідэалагічная вертыкаль не ўмешваецца, распавёў намстаршыні Бярозаўскага райвыканкама Яўген Тарасюк:

"Я не магу ісці і за каго-небудзь збіраць подпісы. Я мушу быць нейтральным. Улада павінная даць людзям магчымасць прыйсці на выбары і зрабіць свой выбар. Таму... Прэзідэнт сказаў — ёсць супрацоўнікі перадвыбарнага штаба, гэта іх трэба спытацца. А я не павінен некаму даваць прэферэнцыі. Нам гэта забаронена па законе".

У Полацкім раёне людзі, мабыць, і хацелі б падпісацца за каго-небудзь акрамя Аляксандра Лукашэнкі, але, паводле звестак намесніка старшыні райвыканкама Пятра Пяткевіча, у вёсках збіраюць подпісы выключна за дзеючага прэзідэнта:

"У нас у вясковых населеных пунктах збору подпісаў за ўсіх 15 кандыдатаў не вядзецца. Па вёсцы ў нас была ініцыятыўная група — бібліятэкар і нехта яшчэ — хадзілі і сабралі пэўную колькасць подпісаў за Лукашэнку".

У паўторную вандроўку па вёсках гэтыя мужныя людзі не паедуць. Таму калі ў вяскоўцаў і ўзнікне жаданне падтрымаць іншых прэтэндэнтаў на прэзідэнцкую пасаду — давядзецца выправіцца ў горад.

Фота: Bymedia.