Удар у 3 кілавольты атрымаў жыхар Івацэвічаў на... рыбалцы
Здарэнне адбылося ўвечары 6 красавіка на раце Грыўда.
Як паведамляе tomin.by, 57-гадовы рыбак вырашыў паспытаць удачы з чыгуначнага маста, за паўкіламетры ад Івацэвічаў. Закідваючы кручок ў ваду, мужчына з размаху зачапіў электрапровад кантактнай сеткі жалезнай дарогі.
Удараны токам мужчына ўпаў паблізу чыгуначных шляхоў. Выкліканыя на месца здарэння выратавальнікі і міліцыянты перанеслі пацярпелага далей ад рэек, а затым перадалі "хуткай дапамозе".
Медыкі дыягнаставалі ў мужчыны апёкі твару, правай рукі і нагі II-IV ступені. З траўмамі рыбак быў шпіталізаваны. Паводле інфармацыі лекараў, яго стан сярэдняй цяжкасці.
