Украінскага амбасадара ў Беларусі звольнілі за “асабістую думку”
Насуперак дыпламатычнай этыцы Раман Бязсмертны ад свайго імя выказваўся пра недэмакратычнасць рэжыму Аляксандра Лукашэнкі.
Указ пра звальненне дыпламата падпісаў сёння ўвечары прэзідэнт Украіны Віктар Януковіч. Напярэдадні Надзвычайны і Паўнамоцны амбасадар Украіны ў Беларусі быў нечакана выкліканы ў Кіеў у Міністэрства замежны справаў.
Сёлета кіраўнік украінскага МЗС Канстанцін Грышчанка ўжо крытыкаваў Рамана Бязсмертнага, які насуперак дыпламатычнай этыцы дазволіў выказаць сваю асабістую думку пра недэмакратычнасць прэзідэнцкіх выбараў ў Беларусі. Тады Канстанцін Грышчанка сказаў: "Ва Ўкраіне этыка дыпламатычнай службы не дазваляе выступаць з заявамі ад уласнага імя. Гэта азначае, што калі чалавек ідзе на дыпламатычную службу, ён павінен свае асабістыя погляды пакінуць у сябе дома", — заявіў міністр замежных спраў.
А ўжо ў траўні, літаральна два тыдні таму, фракцыя камуністаў у Вярхоўнай радзе выказала сваю незадаволенасць тым, як Раман Бязсмертны выконвае сваю дыпламатычную місію ў Беларусі. Нагадаем, што дыпламат быў прызначаны на пасаду амбасадара ў Беларусі папярэднім прэзідэнтам Ўкраіны Віктарам Юшчанкам.
