Уваход у Музей дзяржаўнасці “праз тры дні, пасля праверкі службай бяспекі"
Еўрарадыё запісалася на экскурсію ў Музей сучаснай беларускай дзяржаўнасці. Ёсць шанцы.
"Вы адна з першых, хто спрабуе трапіць у музей, мы на вас вучымся пакуль што”, — кажуць супрацоўнікі музея дзяржаўнасці. І перапісваюць з пашпарту ў спецыяльны бланк мае пашпартныя дадзеныя — дату нараджэння, адрас і месца рэгістрацыі, і нават дату выдачы і тэрміны дзеяння дакумента!
І адразу даведваюся, што адной мне пайсці ў музей... немагчыма:
“Вы адна? Тады мы вас далучым да адной з груп, калі назбіраецца некалькі чалавек ці далучым вас да арганізаваных груп. У нас будуць праходзіць экскурсіі для 10-12 чалавек”, — распавядае супрацоўніца музея. Буду 13-й! Як у серыяле пра Хауса.
Запіс на экскурсіі пачалася 14 жніўня, і пакуль жаданне наведаць музей выказалі некалькі мінскіх арганізацый. Вось бы мне разам з групай крутых працаўнікоў Нафтана…
Агаворваюся, што я іду не проста так – буду фатаграфаваць і запісваць на дыктафон. І тут аказваецца, што фота-відэатэхніку таксама трэба… рэгістраваць! Для фотатэхнікі нават ёсць асобны слупок, трэба ўказаць від і марку.
“Праз тры дні, пасля праверкі дадзеных службай бяспекі прэзідэнта, вы прыйдзеце ў музей і даведаецеся, ці прайшлі праверку”.
Экскурсія праводзіцца тры разы на дзень з гадзінным перапынкам: з 12.00 да 13.00, з 14.00 да 15.00, з 16.00 – да 17.00, акрамя панядзелка і нядзелі.
Пытаюся, а чаму такі вялікі перапынак паміж экскурсіямі і атрымліваю адказ, што ў супрацоўнікаў музея шмат работы і па-за экскурсіямі.
Кошт білета – 10.000 рублёў, экскурсія для дарослай групы – 20.000 рублёў.
Засталося пачакаць тры дні для вырашэння майго лёсу.
