Vanilla Sky сыграюць на сольніку Саладухі ў Мінск-Арэне?

Італьянскія рокеры Vanilla Sky пазнаёміліся з Аляксандрам Саладухам. Гэта адбылося акурат 4 лістапада, у дзень, калі ў Мінску двойчы мусіла прагучаць “Здравствуй, чужая милая”. Еўрарадыё арганізавала сустрэчу музыкаў у філармоніі, дзе праходзіў генеральны прагон творчага вечара кампазітара Эдуарда Ханка.

“Пакажыце, гэта важна, аўтар не бачыў! ― просіць Аляксандр. І тлумачыць аўтару сучаснай версіі хіта “Здравствуй, чужая милая”.― Там фішка ў тым, што хлопцы на рускай мове сыгралі “жывага” і спелі “жывага” ― і такая мова класная!”.

Эдуард Сямёнавіч задаволена ківае ў такт і паказвае вялікі палец: маўляў, цікава! Ну, а авацыі і апладысменты італьянцы раздаюць усё ж Саладуху ― ён спявае са сцэны жыўцом свой галоўны хіт. Такое Vanilla Sky нават не снілася.

pesnia1.mp3

Музыкі Vanilla Sky загарэліся сустрэчай са знакамітым беларускім артыстам пасля таго, як зрабілі кавер на яго песню і пад’язджалі да Беларусі. Ідэю кавер-версіі падкінуў італьянцам іх мэнэджар, кажа музыка Даніэле Аўторэ:

“Па-першае, мы былі ў туры па Расіі разам з нашым тур-мэнэджэрам. Ён адсюль, з Мінску. Мы пацікавіліся меркаваннямі, музыкай ды іншымі штукамі з Беларусі. І ён расказаў нам пра гэтага артыста, пра якога мы раней нічога не ведалі, і даў нам паслухаць яго песню. І мы падумалі, а чаму б не забамбіць кавер на Саладуху? Будзе клёва, бо музычны стыль абсалютна іншы. І паспрабавалі зрабіць Саладуху ў року”.

Музыкі падпяваюць Аляксандру

У выніку аматары кавер-версій Vanilla Sky дадалі ў сваю скарбонку яшчэ адзін хіт. Прычым, дзівіцца ўзрадаваны сустрэчай музыка Вінчэнса Крысці, падчас выканання “Чужой милой” музыкі пачынаюць вар’яцець у добрым сэнсе.

“Яго паводзіны на сцэне проста чумавыя. Атрымліваецца нейкае замкнёнае кола ― калі мы граем яго песню ― мы таксама пачынаем вар’яцець… Сустрэча была цудоўная, бо мы абсалютна яе не чакалі. Ехалі проста, каб адыграць наша шоў, а ў апошнія 5 дзён усё закруцілася. Ееее, мы пабачымся з гэтым вядомым артыстам з Беларусі! Мы праўда ўзрадаваліся гэтай нечаканасці!”

Італьянцы не выключаюць, што яшчэ звернуцца да класікі беларускай эстрады. Аляксандр Саладуха ў сваю чаргу не супраць зрабіць кавер на песню Vanilla Sky. Кажа, трэба паслухаць рэпертуар гурта. Пакуль жа беларускага артыста шчыра радуе сустрэча з рокерамі і пашырэнне геаграфіі гучання “Чужой милой”.

Аляксандр Саладуха: “Шчыра скажу ― я вельмі рады. Вельмі ўсцешаны, калі песня выходзіць за межы тэрыторыі былога Савецкага саюза, тым больш Італія ― Сан-Рэма, спяваючая нацыя, якая гуляе ў футбол! Гэта вельмі здорава! Перапаўняюць пачуцці! Тым больш, юбілей гэтай песні ў гэтым годзе ― 20 гадоў! Лепшага падарунка да юбілею і прыдумаць нельга было! Гэта чарговы раз кажа пра тое, я паўтаруся, што мега-хіт гэтая песня!”

Зараз Аляксандр Саладуха рыхтуе новы альбом “Не заставляйте женщин долго ждать”, рэліз якога запланаваны на 2014 год. Да таго ж, інтрыгуе музыка, лічба 12.12.12 стане для яго і жонкі Наташы вельмі важнай у жыцці. Ды і з італьянцамі, мяркуе Саладуха, яны яшчэ ўбачацца ― наперадзе яго загалоўны канцэрт:

“І загалоўны канцэрт, я веру, абавязкова будзе 8 сакавіка 2014 года ў Мінск-Арэне. Можа быць туды можна было б хлопцаў запрасіць прыехаць? Спец-госць ― гэта таксама была б цікавая фішка, думка. Здорава было б, незвычайна!”

На развітанне Аляксандр дарыць гурту Vanilla Sky свой апошні альбом "Берега" і DVD “Дочки моей глаза” з трыма фільмамі пра сябе. І ўдакладняе, што 4 лістапада не два, а тры разы гучыць “Чужая милая” у Мінску ― яшчэ па тэлебачанні. Падчас яго сольніка ў віцебскім амфітэатры!