Рымашэўскі заклікае ўдзельнікаў Плошчы сведчыць, што яна была мірнай

Улада не будзе адкладаць суды па справе “19 снежня”, упэўнены экс-кандыдат у прэзідэнты Віталь Рымашэўскі. Таму прыйшоў час рыхтавацца да іх і актывістам дэмакратычнага руху.

“Безумоўна, улады будуць імкнуцца зрабіць з гэтых судоў паказальныя працэсы. І дзеянні сілавых структураў сёння накіраваныя на тое, каб, мягка кажучы, напужаць людзей. Тыя ж выклікі на допыты проста за тое, што тэлефон знаходзіўся недзе ў раёне плошчы… Мы павінныя не дапусціць гэтага”, — распавёў Віталь Рымашэўскі ў эфіры Еўрарадыё.

План просты. “Адзіны дзейсны сродак супраць гэтага – каб людзі, якія былі на плошчы, смела, адкрыта сведчылі ў абарону тых, каму прад’яўляюцца абвінавачанні, — працягвае сустаршыня “Беларускай хрысціянскай дэмакратыі”. — Таму мы заклікаем усіх далучыцца да кампаніі “Стань сведкам”. Каб людзі, якія былі на Плошчы, якія чулі заклікі і бачылі дзеянні лідараў, якія могуць засведчыць пра мірны, негвалтоўны характар нашай акцыі і пра спробы лідараў спыніць правакацыі, зрабілі гэта. Мы заклікаем усіх беларусаў: мужных, смелых, неабыякавых — далучацца”.

Віталь Рымашэўскі спадзяецца на тое, што людзі не пабаяцца таго, што праз сведчанні пра падзеі 19 снежня можна наклікаць на сябе нейкія падазроны. “Павелічэнне спісаў падазроных і абвінавачаных не можа адбывацца бясконца, — кажа ён. – Абсурдна мець, скажам, 10 тысяч абвінавачаных. Таму чым больш людзей будзе да кампаніі “Стань сведкам” далучацца — тым меншая верагоднасць персанальных рэпрэсіяў”.