Савет Еўропы: Пытанне аб адменесмяротнага пакарання – прынцыповае

У мінскім музеі Вялікай Айчыннай вайны адкрылася выстава пераможцаў конкурсу графічнага дызайну, прысвечанага адмене смяротнага пакарання. Сёлета тэмай конкурсу стаў лозунг Савета Еўропы "Смерць – гэта не правасуддзе". У экспазіцыі прадстаўленыя 100 лепшых плакатаў з усёй Еўропы.


На адкрыцці выставы старшыня камітэта па пытаннях заканадаўства Палаты прадстаўнікоў Мікалай Самасейка падзякаваў Еўрасаюзу за настойлівасць у пытанні адмены смяротнага і зазначыў, што цяпер у краіне актыўна вядзецца праца па змяненні стаўлення беларусаў да такога прысуду. І калі цяпер параўноўваць колькасць згодных на яго адмену з вынікамі рэферэндуму 1996 года, то змены відавочныя. Але ў кожным выпадку смяротнае пакаранне прапісанае ў Канстытуцыі, а таму яго адмена магчымая праз рэферэндум.


У той жа час прадстаўнік Савета Еўропы Данііл Хачаба растлумачыў, што ніякага ціску на беларусаў з боку еўрапейцаў няма. Проста ёсць пагадненне, паводле якога ў краінах-удзельніцах Савета Еўропы смяротнае пакаранне адмененае.

Данііл Хачаба: "Краіны-удзельніцы Савета Еўропы вырашылі, што смяротнае пакаранне на іх тэрыторыі не павіннае прымяняцца. Якія юрыдычныя магчымасці знойдзе Рэспубліка Беларусь для вырашэння гэтага пытання, каб увайсці ў Савет Еўропы, больш пытанне да беларускіх уладаў. Але казаць пра тое, што Еўрасаюз аказвае нейкі ціск на насельніцтва краіны няправільна".

Ён адзначыў, што пытанне аб адмене смяротнага пакарання з'яўляецца прынцыповым у адносінах Савета Еўропы і Беларусі.


Пагадзіўся з гэтым і старшыня прадстаўніцтва Еўракамісіі ў Беларусі Жан-Эрык Хольцапфель. Ён дадаў, што Еўрасаюз задаволены стварэннем адмысловай камісіі, якая займаецца прасоўваннем адмены смяротнага пакарання ў Беларусі і спадзяецца, што гэты крок станоўча паўплывае на вырашэнне гэтага пытання, а адпаведна і на адносіны з нашай краінай.


Па словах Мікалая Самасейка выстава плакатаў "Смерць – гэта не правасуддзе" таксама паўплывае на вырашэнне гэтага пытання.

Мікалай Самасейка: "Я думаю, што і адкрыццё сённяшняй выставы добра паслужыць гэтай мэце. Мы далёкія ад ідэалізацыя сітуацыі, але калі грамадскае стаўленне зменіцца заўважна, то ў нас будзе магчымасць казаць, калі не пра адмену смяротнага пакарання, то пра ўвядзенне мараторыя, як першага кроку да адмены".


Дададзім, што выстава будзе праходзіць адначасова больш чым у трыццаці гарадах па ўсім свеце, у тым ліку ў офісе Арганізацыі Аб'яднаных Нацый у Нью-Ёрку і ў Еўрапейскім парламенце ў Бруселі. Такім чынам 10 кастрычніка будзе адзначаны Міжнародны дзень барацьбы супраць смяротнага пакарання.


У музеі Вялікай Айчыннай вайны паказ работ пераможцаў конкурсу графічнага дызайну "Смерць – гэта не правасуддзе", будзе працаваць да 11 снежня.