СБУ: На Юлію Цімашэнку можа рыхтавацца замах
Украінскія спецслужбы маюць інфармацыю пра пагрозу жыццю кандыдата ў прэзідэнты Украіны.
Уначы Служба бяспекі Украіны распаўсюдзіла афіцыйнае паведамленне Упраўлення дзяржаўнай аховы. Менавіта яго супрацоўнікі адказваюць за бяспеку Юліі Цімашэнкі, як кандыдата ў прэзідэнты. Аднак, як адзначае Укрінфарм, нягледзячы на трывожную інфармацыю, лідарка партыі "Бацькаўшчына" не перарвала сваю паездку ў Мікалаеўскую вобласць.
Дарэчы, паводле апытанняў Юлія Цімашэнка прайграе іншаму кандыдату ў прэзідэнты Пятру Парашэнку. З-за гэтага нямала апанентаў абвінавачваюць Цімашэнку ў спробе сарваць выбары, якія яна "не можа выйграць".
Замах на Юлію Цімашэнку мог бы паспрыяць дэстабілізацыі сітуацыі ва Украіне ды стаць прычынай пераносу прэзідэнцкіх выбараў.
Фота — AFP
