Стала вядома, хто зможа са студзеня перайсці на падатак на прафесійны даход

Стала вядома, хто зможа з наступнага года перайсці на выплату падатку на прафесійны даход. Пералік відаў дзейнасці, з якіх можна будзе плаціць падатак на прафдаход, вызначыў Саўмін.

Падатак на прафесійны даход — гэта спецыяльны падатковы рэжым для фізічных асоб, які ўводзіцца з 1 студзеня 2023 года. Перайсці на такую сістэму падаткаабкладання могуць толькі самазанятыя, у якіх няма працадаўцы і наёмных работнікаў у падначаленні.

Чалавек сам вырашае, ці хоча ён пераходзіць на такую сістэму выплаты падатку.

У пералік відаў дзейнасці, з якіх можна будзе плаціць новы від падатку, увайшлі сярод іншага: рамесніцкая дзейнасць, дзейнасць па аказанні паслуг у сферы аграэкатурызму, продаж фізічнымі асобамі кветак, продаж кандытарскіх вырабаў уласнай вытворчасці, відэаздымка падзей, дзейнасць па пісьмовым і вусным перакладзе, нанясенне аквагрыму, наладжванне, рамонт музычных інструментаў, цырульні і касметычныя паслугі, а таксама паслугі па манікюры і педыкюры. Увесь пералік даволі шырокі, з поўным спісам відаў дзейнасці можна пазнаёміцца тут.

Выплата падатку на прафесійны даход замяняе выплату:

• падаходнага падатку з фізічных асоб;
• збору за ажыццяўленне рамесніцкай дзейнасці;
• адзінага падатку з індывідуальных прадпрымальнікаў і іншых фізічных асоб;
• абавязковых страхавых унёскаў.