Старшыня КДК — моладзі: Не спяшайцеся, свая кватэра калі-небудзь у вас з'явіцца
Падчас візіту на віцебскае ААТ "Малако" старшыня Камітэта дзяржкантролю Леанід Анфімаў правёў прыём грамадзян.
Як адзначае БЕЛТА, да яго звярнуліся пераважна маладыя работнікі прадпрыемства, якія цікавіліся жыллёвым пытаннем. Маладыя людзі пыталіся пра магчымасць атрымаць ільготны крэдыт, як прапісацца ў інтэрнаце адзіночкам і людзям з дзіцем, як прыватызаваць камерцыйнае жыллё. "Не прыспешвайце падзеі, галоўнае — каб у прынцыпе быў дах над галавой, а свая кватэра калі-небудзь абавязкова з'явіцца", — адказаў ім Анфімаў.
Па яго словах, ёсць розныя спосабы вырашыць жыллёвае пытанне: інтэрнат, арэнднае жыллё, камерцыйныя крэдыты, стаўкі па якіх цяпер падаюць. Старшыня КДК выказаў меркаванне, што да канца 2017 — пачатку 2018 года эканоміка краіны пойдзе ў рост, пасля гэтага будуць перагледжаныя сацыяльныя праграмы, у тым ліку ўмовы льготнага крэдытавання.
Адказаў Анфімаў і на іншыя пытанні. У прыватнасці, да яго звярнуўся малады бацька, у якога 9-гадовы сын сур'ёзна хворы і адчувае сябе ўсё горш, нягледзячы на аказаную ў Беларусі медыцынскую дапамогу. Па словах устурбаванага бацькі, ён сумняецца ў пастаўленым дыягназе. Старшыня Дзяржкантролю абяцаў папрасіць міністра аховы здароўя ўзяць гэты выпадак на асабісты кантроль і правесці паўторнае абследаванне.
