Светлагорскае "Хімвалакно" не пастаўляе кісларод нікому, апроч раённага шпіталя
"Светлагорскхімвалакно" паведаміла сваім пакупнікам, што спыняе продаж тэхнічнага кіслароду. Цяпер увесь выраблены прадпрыемствам кісларод ідзе на патрэбы раённага шпіталя. Адпаведны дакумент публікуе Радыё "Свабода".
У лісце за подпісам гендырэктара Васіля Касцюкевіча гаворыцца, што ў выніку складанай эпідэміялагічнай сітуацыі прадпрыемства перайшло ў рэжым жорсткай эканоміі расходу кіслароду.
Максімум, на які гатовы вытворца, — вылучаць 1-2 балоны кіслароду на дзень. Дый тое — у экстраных аварыйных выпадках.
Светлагорскае "Хімвалакно" вырабляе тэхнічны і медыцынскі кісларод больш за 40 гадоў. У адзін 40-літровы балон змяшчаецца крыху больш за 6 кубаметраў кіслароду. Для інгалятара з маскай такога балона хопіць на некалькі сутак, для апарата штучнай вентыляцыі лёгкіх — на адны суткі.
Паводле афіцыйнай статысткі Мінздароўя, за мінулыя суткі былі зафіксаваныя 1998 новых хворых з каранавірусам, а 16 пацыентаў памёрлі.
