"Сябры камісій так запалоханыя, што не могуць адмовіцца ад фальсіфікацый"

Аляксандр Лукашэнка і губернатар Брэсцкай вобласці Канстанцін Сумар "не адказваюць за свае словы". Так Анатоль Лябедзька пракаментаваў адказ з Генпракуратуры на запыт Аб'яднанай грамадзянскай партыі з нагоды прызнання прэзідэнта і губернатара вінаватымі ў фальсіфікацыях падчас мінулых выбараў кіраўніка краіны.

Анатоль Лябедзька: “Мы ў чарговы раз зрабілі зварот на імя Генпракурора Беларусі пасля чарговых заяў Аляксандра Лукашэнкі з нагоды таго, што вынікі прэзідэнцкіх выбараў былі фальсіфікаваныя, і заявы Сумара, што і ў Брэсцкім рэгіёне былі фальсіфікацыі. З адказу вынікае, што альбо Сумар і Лукашэнка недзеяздольныя і яны проста не адказваюць за свае словы, і таму не могуць быць прыцягнутыя да крымінальнай адказнасці, альбо — што яны хлусы. Вось што вынікае з адказу”.



У адказе на запыт Аб'яднанай грамадзянскай партыі адзначаецца, што Генпракуратура не мае дакументальных пацвярджэнняў аб скажэнні вынікаў выбараў, а таксама звестак пра нейкія іншыя парушэнні, дапушчаныя падчас падліку галасоў.

Анатоль Лябедзька як былы кандыдат у дэпутаты Палаты прадстаўнікоў па Старавіленскай акрузе №105 звярнуўся ў Генпракуратуру з патрабаваннем правесці расследаванне наконт законнасці абрання дэпутатам ад гэтай акругі Мікалая Самасейкі. Нагодай для такога звароту стаў артыкул у газеце “Народная воля”. У гэтым матэрыяле падпалкоўнік міліцыі Мікалай Казлоў расказаў пра фальсіфікацыі на адным з выбарчых участкаў Мінска, дзе ён нёс службу.

На сустрэчы Лябедзькі з журналістамі прысутнічаў і герой гучнага артыкула. Еўрарадыё пацікавілася ў яго, што прымусіла старшага ўпаўнаважанага па асабліва важных справах заняцца выкрыццём фальсіфікацыі выбараў.

Мікалай Казлоў: “Шчыра кажучы, я чакаў, што пракуратура будзе ўсё ж такі праводзіць нейкую праверку пасля таго, як інфармацыя аб фальсіфікацыях з’явілася ў інтэрнэце. Але ўсё прайшло незаўважна і ніякай афіцыйнай рэакцыі не было. Размовы з кіраўніцтвам у нас пра гэта былі, але ніякай праверкі не было. Зараз ізноў пачынаюцца выбары, і я бачу, што мала што змяняецца. І магчыма, тыя ж людзі ізноў будуць працаваць у выбарчых камісіях. Так не павінна быць”.



У той жа час былы падпалкоўнік сцвярджае, што правесці праверку па фактах фальсіфікацый з прафесійнага пункту гледжання зусім не складана.

Мікалай Казлоў: “Каб у гэтай сітуацыі высветліць усё, да апошняга руху, неабходна зусім мала часу. У гэтую справу так ці інакш уцягнута даволі шмат людзей. А гэта ж не прафесійныя злачынцы — а звычайныя, нармальныя людзі. Я звольніўся з пасады старшага ўпаўнаважанага па асабліва важных справах, і я сцвярджаю: для таго, каб зняць гэтае пытанне і высветліць, як усё было насамрэч, трэба вельмі мала часу. Гэта вельмі проста насамрэч. Галоўнае — жаданне. А вось ці будзе яно ў пракуратуры альбо тых людзей, якія будуць гэтым займацца, — пытанне іншае”.

Падчас размовы Мікалай Казлоў асабліва адзначыў: паводле яго назіранняў, сябры выбарчых камісій да такой ступені запалоханыя, што не могуць адмовіцца ад фальсіфікацый.

Мікалай Казлоў: “Я не рыхтаваўся некага лавіць за руку — я проста нёс службу. І калі мы размаўлялі са старшынёй камісіі, я бачыў, што ёй страшна, але яна не магла рабіць інакш. У мяне склалася такое ўражанне. Я не ведаю, як з імі размаўляюць, што ім кажуць, але я яе ўпэўніваў гэтага не рабіць, не займацца фальсіфікацыяй. Але атрымалася так, як атрымалася. Ёй не так страшна было мець са мной справу, хоць я быў у форме і нёс службу, чым не падкінуць гэтыя бюлетэні”.

Ці будзе рэакцыя Генпракуратуры на выступ міліцыянера і старшыні АГП, ні Казлоў, ні Лябедзька прадказаць не бяруцца. Але спадзяюцца, што агучванне падобнай інфармацыі прымусіць сябраў камісій на гэтых прэзідэнцкіх выбарах задумацца і не займацца фальсіфікацыямі.

Фота: Змітра Лукашука