Сям'я прадпрымальнікаў назвалася беднай, каб атрымаць ільготны крэдыт на жытло
Упраўленне Следчага камітэта па Магілёўскай вобласці ўзяло пад варту і пачало крымінальную справу на сям'ю прадпрымальнікаў — мужа і жонку. Мужу 50 гадоў, жонцы — 47. Іх вінавацяць у асабліва буйным махлярстве за атрыманне дзяржаўнай дапамогі, прызначанай для малазабяспечаных грамадзян.
Магілёўцы займаліся прадпрымальніцкай дзейнасцю і былі забяспечанымі людзьмі. Аднак яны знарок прынізілі сукупны даход і маёмаснае становішча сваёй сям'і. Яны падалі ў адпаведныя арганізацыі дакументы, быццам іх сям'я ў складзе пяці чалавек з'яўляецца малазабяспечанай. Дзякуючы гэтым дакументам яны атрымалі бязвыплатную субсідыю на будаўніцтва жылля, а таксама фінансавую дапамогу дзяржавы на пагашэнне ільготнага крэдыту.
Пасля пачатку крымінальнай справы праваахоўныя органы наклалі арышт на маёмасць абвінавачаных: тры будынкі міні-кавярняў, гатэль, два жылыя будынкі, адміністрацыйна-вытворчы корпус, чатыры аўтамабілі, два матацыклы — BMW і Harley Davidson.
