Сярэдняя пенсія не дацягнула да 40% ад сярэдняга заробку. Але зусім крыху

Напачатку 2010-х у Беларусі існаваў сацыяльны стандарт: сярэдняя пенсія не павінна быць меншай за 40% ад сярэдняга заробку. У 2016 годзе пра гэта як пра важны факт для нацыянальнай бяспекі згадвала тагачасная міністр працы і сацыяльнай абароны Марыяна Шчоткіна. Аднак да сярэдзіны 2018 года суадносіны паміж заробкамі і пенсіямі ўпалі да 36%.

У канцы 2017 года ўжо наступная міністр працы і сацыяльнай абароны насельніцтва Ірына Касцевіч распавяла Еўрарадыё, што пенсіі ў 2018 годзе вырастуць толькі аднойчы. 1 траўня гэта падвышэнне адбылося — на 5,3%. Але пазней улады правялі яшчэ два падвышэнні пенсій: 1 жніўня (на 10%) і 1 лістапада (зноў на 5,3%).