У Бабруйску адмянілі шэраг антыкавідных забаронаў, а па краіне — вярнулі назад
У наземным гарадскім транспарце адмянілі абавязковае нашэнне масак, але ў метро без маскі не пусцяць / sb.by
У Бабруйску, дзе днямі зрабілі істотна больш жорсткімі меры па прафілактыцы COVID-19, адмененыя адразу чатыры патрабаванні, рашэнне апублікаванае на сайце гарвыканкама.
Неабавязковым стала нашэнне масак у крамах і аптэках. У начны клуб зноў можна будзе трапіць без ПЦР-тэсту і даведкі аб вакцынацыі. Таксама без масак можна ездзіць у грамадскім транспарце, палічылі ў Бабруйскім гарвыканкаме.
У Міністэрстве аховы здароўя, між тым, крыху адкарэктавалі першапачатковае паведамленне аб адмене абавязковага масачнага рэжыму. У наземны гарадскі пасажырскі транспарт без масак цяпер сапраўды можна, а вось у метро нельга.
У новай версіі паведамлення медыцынскага ведамства гаворыцца, што без маскі можна знаходзіцца "пры наведванні аб'ектаў і арганізацый, за выключэннем паветранага, воднага, чыгуначнага транспарту, уключаючы метрапалітэн".
