У Беларусі нельга рэгістраваць праваабарончыя аб’яднанні – Мінюст

Прысуд па скарзе групы праваабаронцаў на адмову Мінюсту ў рэгістрацыі грамадскага праваабарончага аб’яднання “Вясна” будзе агучаны заўтра ў Вярхоўным судзе Беларусі.

Нагадаем, чыноўнікі тлумачылі сваё рашэнне тым, што такую назву ўжо меў ліквідаваны ў 2003 годзе праваабарончы цэнтр “Вясна”. Таксама падставай для адмовы называўся той факт, што заснавальнікі прыцягваліся да адміністрацыйнай адказнасці.

Сёння падчас спрэчак у Вярхоўным судзе праваабаронцы даказвалі, што патрабаванні Міністэрства юстыцыі не грунтуюцца на законе.

У сваім выступе старшыня аб’яднання Алесь Бяляцкі звярнуў увагу на маральна-этычны бок справы, на сітуацыю з правамі чалавека ў краіне, правёў гістарычныя аналогіі.

Сваё меркаванне наконт таго, чаго ж чакаць ад заўтрашняга абвяшчэння прысуду, Еўрарадыё выказаў праваабаронца Уладзімір Лабковіч:

“Я думаю, што рашэнне будзе сыходзіць не з прававых абгрунтаванняў, бо тады бясспрэчна трэба нашу скаргу задавальняць, а выключна з палітычных меркаванняў.

Прадстаўнік Міністэрства юстыцыі заявіў, што ў нас забаронена рэгістраваць грамадскія аб’яднанні, якія выступаюць у абарону правоў чалавека”.

Адзначым, што прысуд будзе агучаны ў 12 гадзінаў 26 кастрычніка.