У дровах з Беларусі польскія мытнікі знайшлі цыгарэты на 500 тысяч долараў
У партыі дроў з Беларусі польскія мытнікі выявілі буйную кантрабанду — 158 тысяч пачкаў цыгарэт без акцызных марак, паведамляе Дзяржаўная фіскальная адміністрацыя Польшчы.
Кантрабанду выявілі 15 верасня ў пункце пропуску "Карошчын". Пры сканаванні на рэнтген-апараце дроў, якія везлі ў грузавіку, мытнікі заўважылі штосьці незвычайнае. Выявілася, што ў скрынках пад дровамі ляжаць кантрабандныя цыгарэты.
Кошт кантрабанды ацэньваецца ў больш як 2,2 мільёна злотых (каля 550 тысяч долараў). Гэта самая буйная сёлета кантрабанда цыгарэт у Люблінскім ваяводстве і адна з найбуйнейшых у краіне.
