У Ерэване паліцыя затрымала дзясяткі ўдзельнікаў акцыі пратэсту

У Ерэване паліцыя затрымала дзясяткі ўдзельнікаў акцыі пратэсту супраць вылучэння на пасаду прэм’ера Арменіі Сержа Саргсяна, былога прэзідэнта краіны. Спачатку паведамлялася пра 30 чалавек, пазней — пра 80. Усіх іх завезлі ў паліцыю і абвінавачваюць у здзяйсненні адміністрацыйных правапарушэнняў. Двое апазіцыянераў уварваліся ў будынак Грамадскага радыё і патрабавалі жывога эфіру, але іх там затрымалі. Аднак арганізатары акцыі збіраюцца працягваць “вулічнае супраціўленне” — пратэстоўцы ходзяць па вуліцах і перакрываюць на іх рух транспарту, інфармуе “Новая газета”. Лідар апазіцыі Нікол Пашынян аб’явіў пра пачатак “аксамітнай рэвалюцыі”. Пратэстоўцы блакуюць будынкі дзяржаўных устаноў.

У аўторак удзельнікі акцыі пратэсту збіраліся блакіраваць усе падыходы да парламента, дзе 17 красавіка могуць правесці галасаванне па кандыдатуры Саргсяна. Яго кандыдатуру ў панядзелак вылучылі кааліцыйныя сілы — Рэспубліканская партыя Арменіі і Дашнакцуцюн. 16 красавіка ў Ерэване адбыліся сутыкненні пратэстоўцаў (іх было некалькі тысяч чалавек) і паліцыі, якая здолела адцясніць людзей ад парламента. Пацярпелі дзясяткі чалавек.

З 2 сакавіка новым прэзідэнтам Арменіі з’яўляецца Армен Саркісян, які быў абраны Нацыянальным сходам. Аднак у краіне пачала дзейнічаць абноўленая Канстытуцыя, паводле якой рэальная ўлада будзе не ў прэзідэнта, а ў парламента і ўраду.