У Фінляндыі эколагі на адзін дзень блакавалі атамную станцыю (фота)

28 жніўня некалькі соцень прадстаўнікоў экалагічных арганізацый заблакавалі дарогі, якія вядуць да фінскай АЭС. Мірная акцыя была накіраваная супраць рашэння парламента пра магчымасць будаўніцтва 2-х новых атамных рэактараў і сховішча ядзерных адходаў. Сярод удзельнікаў былі і беларусы.

"Некалькі соцень чалавек ― гэта нармальная колькасць людзей па фінскіх мерках, тым больш яны былі даволі радыкальна настроеныя, ― распавяла Еўрарадыё адказны сакратар беларускай экалагічнай арганізацыі "Экадом" Таццяна Новікава, якая прысутнічала падчас акцый пратэсту. ― Фінляндыя, як і іншыя паўночныя еўрапейскія краіны, вельмі спакойная. І пратэсты з сотнямі тысяч людзей, як у Нямеччыне, Фінляндыі не ўласцівыя".

Актывістам удалося блакаваць дарогу да АЭС у некалькіх месцах на працягу ўсяго дня. Яны трымалі транспаранты і банеры з заклікамі спыніць інвестыцыі ў атамную энергетыку, зачыніць АЭС і развіваць альтэрнатыўныя віды энергіі.

Паліцыя дзейнічала карэктна да таго часу, калі ўвечары не паступіў загад ачысціць дарогу. У выніку каля 30 чалавек затрымалі за непадпарадкаванне паліцыі. Праз некалькі гадзінаў іх выпусцілі, пакараўшы штрафамі.

Таццяна Новікава: "Дзеянні былі мяккімі і лаяльнымі да моманту развязкі, калі пачалі затрымліваць людзей"

Паліцыянт ужывае болевы прыём удзельніцы пратэсту. Фота: Nora Ohala

Першага ліпеня фінскі парламент прыняў рашэнне дазволіць будаўніцтва новых АЭС. На ўжо дзейнай станцыі Олкілуото плануецца будаўніцтва дадатковых рэактараў, а таксама сховішча ядзерных адкідаў.

Таццяна Новікава: "Шмат людзей гавораць, што тыя дэпутаты, якія прагаласавалі "за", наўрад ці ўвойдуць у наступны склад парламента (а выбары ўжо наступнай вясной), бо рашэнне гэта непапулярнае, не падабаецца людзям".

Паводле апытанняў, толькі 10-15% фінаў падтрымліваюць ядзерную энергетыку.

Тацяна Новікава перадае словы каардынатара фінскага руху "Жанчыны супраць ядзернай энергетыкі" Улы Клотзэр:

"Мы ўдзельнічаем у блакадзе, бо хвалюемся за нашых дзяцей. Праект будаўніцтва АЭС "Олкілуото-3" ― гэта эканамічны кашмар, бо яго цана імкнецца ў космас. Олкілуото – справа ўсёй Еўропы".

На фотаздымку: Ула Клотзэр.

Сапраўды, праект абыходзіцца ўдвая больш за першапачатковую суму. Больш за тое, запланаваны на вясну 2009 праект спазняецца сама менш на тры з паловай гады.

Нагадаем, раней у размове з Еўрарадыё дацэнт шведскага ўніверсітэта ў Лундзе Філіп Пэк правёў паралелі з будаўніцтвам АЭС у Фінляндыі і Беларусі.

Філіп Пэк: "Звычайна атамныя станцыі будуюць вялікія заможныя краіны. У рэгіёне іх будуе толькі адна маленькая, але заможная краіна — Фінляндыя. Беларусь таксама малая, але ж незаможная. Яна не мае прыватных інвестараў. Таму АЭС будуць узводзіць за ўрадавыя — значыць, вашы, грамадзянаў Беларусі — грошы".

Тым часам укладаць грошы ў будаўніцтва фінскіх атамных рэактараў плануюць прыватныя інвестары.

Па словах Таццяны Новікавай, міжнародная салідарнасць людзей, якія хочуць жыць у асяроддзі без мірнага атама, вялікая. І гэтыя людзі лічаць патрэбным выказваць свае думкі пра АЭС і ў суседніх краінах.

Таццяна Новікава: "Калі беларусы папросяць ім дапамагчы пратэставаць альбо выказваць сваё меркаванне, яны пагодзяцца прыехаць".

Усе фотаздымкі (апрача падпісанага аўтарства Nora Ohala) зробленыя Таццянай Новікавай і размешчаныя з яе ласкавай згоды.