У Гомельскай вобласці з аўкцыёну прадаюць "Пункт пазіцыі ракет"
"Пункт пазіцыі ракет" / Гомельаблмаёмасць
Незвычайны лот выставіў на электронны аўкцыён камітэт дзяржмаёмасці Гомельскага аблвыканкама, заўважыў "Флагшток". Гэта будынак у вёсцы Бабровічы Калінкавіцкага раёна пад назвай "Пункт пазіцыі ракет/службовае памяшканне".
Гаворка ідзе пра будынак на тэрыторыі старога савецкага вайсковага аэрадрома, рэшткі якога прадаюць з мінулага года. На яго месцы хочуць размясціць выпрабавальны палігон. У мінулы раз на таргі выстаўлялі частку былога аэрадрома, у тым ліку былыя сродкі радыёлакацыі, метэаслужбы, а таксама жалезабетоннае пакрыццё.
Будынак плошчай амаль 530 квадратных метраў прадаюць для выкарыстання як аб'ект рознічнага гандлю, бытавога абслугоўвання насельніцтва, адміністрацыйнага ці адміністрацыйна-гандлёвага прызначэння або выкарыстання як інтэрната.
Пачатковы кошт лота — 51 673 рублі (каля 16 тысяч долараў). Зямельны ўчастак здаецца ў арэнду на 50 гадоў.
У савецкі час на гэтым аэрадроме дыслакавалася савецкая стратэгічная авіяцыя — спачатку 953-і бамбардзіровачны полк "Віцебскі", а потым 306-ы бамбардзіровачны полк. Побач з аэрадромам была зона з ядзернымі боепрыпасамі. У 1993 годзе авіяполк перавялі ў Расію.
