У Маскве і Дамаску пракаментавалі заяву Трампа пра ракетны ўдар па Сірыі

У Маскве і Дамаску пракаментавалі заяву Дональда Трампа аб ракетным удары па Сірыі. У сваім акаўнце ў Twitter амерыканскі прэзідэнт напісаў: “Расія абяцае збіваць любыя ракеты, якія будуць запушчаныя па Сірыі. Рыхтуйся, Расія, таму што яны прыляцяць прыгожыя, новыя і разумныя”. Злучаныя Штаты збіраюцца пакараць улады Сірыі за нядаўнюю хімічную атаку ў горадзе Дума, ахвярамі якой сталі 49 чалавек.

Масква не падтрымлівае Twitter-дыпламатыю і не раіць амерыканскім уладам пагаршаць і так далікатную сітуацыю ў Сірыі, заявіў прэс-сакратар расійскага прэзідэнта Дзмітрый Пяскоў. Таксама ён адзначыў, што ЗША спрабуюць выкарыстаць “прыдуманую нагоду” для нанясення ракетнага ўдару, інфармуе РІА “Навіны”.

Прэзідэнт Сірыі Башар Асад у сераду зрабіў заяву пра ворагаў яго краіны: “Асноўная зброя, якую выкарыстоўваюць нашы ворагі, — гэта прапаганда экстрэмізму і стварэнне інтэлектуальнай і рэлігійнай нецярпімасці сярод прадстаўнікоў аднаго грамадства”. Як вядома, улады Сірыі адмаўляюць сваё дачыненне да хімічнай атакі. Іх у гэтым падтрымлівае Расія.