У мінскім заапарку можа з'явіцца пінгвінарый

У мінскім заапарку можа з'явіцца пінгвінарый, расказаў агенцтву "Мінск-Навіны" кіраўнік адміністрацыі Заводскага раёна сталіцы Сяргей Масляк.

Ён цяпер знаходзіцца ў Новасібірску, дзе праходзяць Дні Мінска. Беларускія чыноўнікі ўжо наведалі шэраг мясцовых прадпрыемстваў. Сяргея Масляка асабліва ўразіў Новасібірскі заапарк.

"Некаторыя моманты намі падгледжаныя і найбліжэйшым часам будуць рэалізаваныя ў мінскім заапарку", — расказаў ён. З яго слоў, марай, якую найбліжэйшым часам чыноўнікі збіраюцца рэалізаваць, застаецца будаўніцтва пінгвінарыя.

Заапарк у Мінску быў адкрыты ў 1984 годзе. Цяпер калекцыя жывёл налічвае каля 400 відаў. Працуюць і пастаянныя экспазіцыі (экзатарыум, акварыум, тэрарыум).