У Мінску адбылася сустрэча прадстаўніцы ЕС з уладамі і апазіцыяй

З уладамі і апазіцыяй сустракалася ў Мінску дырэктар Генеральнага сакратарыяту Савета Еўрасаюза Хельга Шміт. Як даведалася Еўрарадыё, сустрэчы мелі закрыты характар, таму іх падрабязнасці невядомыя.  Вось што кажа ўдзельнік сустрэчы лідэр Аб'яднанай грамадзянскай партыі Анатоль Лябедзька:

"Пацвярджаю факт сустрэчы, удзел у ёй шасці асоб з боку грамадзянскай супольнасці і тое, што размаўлялі мы, так скажам, на адной мове. Магу пацвердзіць, што спадарыня Шміт сустракалася таксама з Пяткевіч і з Варанецкім".

Адзначым, што Наталля Пяткевіч - гэта намеснік кіраўніка Адміністрацыі прэзідэнта, а Валерый Варанецкі - намеснік міністра замежных спраў Беларусі. Спадарыня Хельга Шміт вядзе перамовы ў Мінску з чыноўнікамі пра паляпшэнне адносінаў Беларусі і ЕС.

Анатоль Лябедзька так выказаўся наконт сваіх уражанняў па выніках сустрэчы з прадстаўніцай Еўрасаюза:

"Здаецца, караван рухаецца. Усе разумеюць, што вельмі павольна, хацелася б, каб хутчэй. Але тое, што ёсць, тое ёсць".