У пракуратуры незадаволеныя чыноўнікамі, якія правяраюць цэны ў крамах
Праверка цэн у Пінску / Раённае аб'яднанне прафсаюзаў
Пракуратура Брэсцкай вобласці вырашыла праверыць чыноўнікаў, якія правяраюць цэны, і выказала незадаволенасць іх прафесійным узроўнем, неабходным для гэтай працы.
"Да прыкладу, мелі месца факты, калі ў склад рабочых груп уваходзілі службовыя асобы, якія не валодаюць неабходным узроўнем спецыяльных пазнанняў у фінансава-эканамічнай сферы. У асобных выпадках выбар аб'екта праверкі аказваўся немэтазгодным. Менш увагі надавалася гандлёвым аб'ектам, размешчаным у сельскай мясцовасці", — паведаміла прэс-служба.
Па выніках праверкі пракурор вобласці накіраваў старшыні Брэсцкага аблвыканкама інфармацыйную запіску, у якой прапанаваў меры па выпраўленні сітуацыі.
Месяц таму, пасля загаду Лукашэнкі "спыніць рост цэн", Генеральная пракуратура пачала сумесна з чыноўнікамі "на месцах" ладзіць "рэйды" па крамах па ўсёй Беларусі. Ведамства расказвала, што з 6 па 13 кастрычніка ў КДК паступіла 531 паведамленне аб павышэнні цэн, заведзена 18 крымінальных справаў.
