У расійскага апазіцыянера Навальнага таксічнае атручванне, ён у коме

У расійскага апазіцыянера Аляксея Навальнага таксічнае атручванне, ён у рэанімацыі. Пра гэта ў Twitter паведаміла яго прэс-сакратар Кіра Ярмыш. Палітыку стала кепска ў самалёце, які выконваў рэйс з Томска ў Маскву. Была здзейснена экстраная пасадка ў Омску, Навальнага забрала ў бальніцу "хуткая".

"Мы мяркуем, што Аляксея атруцілі чымсьці, падмяшаным у гарбату, — піша Ярмыш. — Гэта было адзінае, што ён піў з раніцы".

Па словах прэс-сакратара, лекары кажуць, што таксін трапіў у арганізм менавіта "праз гарачую вадкасць".

Аляксей Навальны ў коме.

Навальнаму 44 гады. Ён з'яўляецца адным з самых яркіх расійскіх апазіцыйных лідараў. Вядомы сваімі расследаваннямі пра карупцыю ў расійскай уладзе. Апошнім часам шмат увагі надаваў падзеям у Беларусі. А Аляксандр Лукашэнка нават згадваў яго магчымае дачыненне да арганізацыі "масавых беспарадкаў" у нашай краіне.

"Новая газета" нагадвае, што на Аляксея Навальнага раней неаднаразова здзяйсняліся замахі, у тым ліку і атручванні.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.