Украіна адмовілася ад расійскай гуманітарнай дапамогі
МЗС Украіны накіраваў расійскаму боку ноту, у якой гаворыцца пра немагчымасць прыняць дапамогу з-за няпэўнасці яе адрасата.
Раней расійскае знешнепалітычнае ведамства даслала ноту ў Кіеў з інфармацыяй пра намер накіраваць бежанцам на ўсходзе Украіны дапамогу.
Меркавалася, што грузавыя аўтамабілі накіруюць 28 чэрвеня ў Луганск, Данецк, а таксама іншыя рэгіёны, дзе знаходзяцца бежанцы. Масква папрасіла паспрыяць гэтай акцыі, перадае ВВС.
Аднак Кіеў адмовіў у гэтай просьбе, спаслаўшыся на статут ААН. Згодна з гэтым дакументам, бежанец — гэта асоба, якая можа “у сілу абгрунтаваных асцярогаў стаць ахвярай пераследу па прыкмеце расы, веравызнання, грамадзянства або палітычных перакананняў, знаходзіцца па-за межамі краіны сваёй грамадзянскай прыналежнасці і не можа карыстацца абаронай ураду гэтай краіны”.
“Улічваючы той факт, што Данецкая і Луганская вобласці, як і Аўтаномная Рэспубліка Крым, з’яўляецца неад’емнай часткай Украіны, у адпаведнасці з вышэйазначанымі міжнароднымі дакументамі грамадзяне Украіны, якія знаходзяцца на гэтай тэрыторыі, не могуць у прынцыпе мець статус бежанцаў”, — заявілі ва ўкраінскім МЗС.
