Вымагальнікаў з Мазырскага раёна будуць судзіць за выкраданне даўжніка

Мазырскі раённы аддзел Следчага камітэта завяршыў расследаванне крымінальнай справы ў дачыненні жыхароў раёна, якія выкралі 29-гадовага мужчыну і патрабавалі ад яго перадаць маёмасць у залік пагашэння пазыкі.

Як паведамляе прэс-служба Следчага камітэта, інцыдэнт здарыўся 12 снежня мінулага года. Жыхар Мазыра, які працуе вальшчыкам лесу ў Лельчыцкім раёне, вяртаўся пасля змены дадому разам з калегамі. Па дарозе аўтамабіль, які падвозіў работнікаў, спыніўся на трасе каля вёскі Буда-Сафіеўка. На дарозе іх чакаў 32-гадовы брыгадзір, які ў той дзень не выйшаў на працу. Ён разам са сваёй знаёмай, дзяўчынай 1994 года нараджэння, змог выманіць вальшчыка і пасля запрасіў яго ў салон свайго аўто.

Пацярпелы раней быў знаёмы з гэтай дзяўчынай: яна пагасіла яго запазычанасць па банкаўскім крэдыце на будаўніцтва кватэры і за электраэнергію.

Зламыснікі прывезлі мужчыну на аўтазапраўку ў вёсцы Нараўчызна Мазырскага раёна. Яго гвалтам утрымлівалі ў салоне, пагражалі фізічнай расправай і вымушалі напісаць распіску аб перадачы абвінавачанай 1 150 долараў у кошт пагашэння доўга. У распісцы ад яго патрабавалі перадаць права ўласнасці на кватэру іншай асобе ў  выпадку несвоечасовага вяртання грошай.

Мужчына адмовіўся выканаць гэтыя патрабаванні, пасля чаго яго вывезлі ў лес і збілі. Затым яго адвезлі дадому і прайшлі разам з ім у пад’езд. Пацярпеламу ўдалося схавацца ад зламыснікаў у кватэры суседзяў. На наступны дзень ён звярнуўся ў міліцыю. Праваахоўнікі знайшлі зламыснікаў і затрымалі іх.

Іх крымінальная справа накіраваная ў суд.