Вызваленне Алексіевіч ад падатку з Нобелеўскай прэміі залежыць ад урада
Мінская падатковая інспекцыя гатовая вызваліць ад падатку з Нобелеўскай прэміі пісьменніцу Святлану Алексіевіч. Але адпаведнае рашэнне павінен прыняць урад. Пра гэта заявіла намесніца начальніка інспекцыі Галіна Гурыновіч.
"Калі да нас паступіць рашэнне ўрада аб вызваленні ад выплаты падатку з Нобелеўскай прэміі Святланы Алексіевіч, мы яго, вядома, выканаем. Будзе рашэнне — будзе вызваленая, не будзе — заплаціць", — перадае БелаПАН словы чыноўніцы.
Раней падаткавікі заяўлялі, што вызваленне Алексіевіч ад падатку з Нобелеўскай прэміі магчымае толькі асобным указам кіраўніка дзяржавы. Калі яна не будзе вызваленая ад падатку, то павінна будзе заплаціць 13%.
Прэс-сакратар Міністэрства па падатках і зборах Сяргей Шкут раней казаў, што ў беларускім Падатковым кодэксе няма ільготаў для нобелеўскіх лаўрэатаў. Ёсць толькі льготы для лаўрэатаў дзяржаўных і прэзідэнцкіх прэмій.
