Як рэйв кахання і свабоды ў Ізраілі стаў начным кашмарам

Першыя ракеты з сектара Газа па Ізраілі былі выпушчаныя незадоўга да світання 7 кастрычніка. Яны пранесліся ў небе над тысячамі гулякаў, якія танцавалі ўсю ноч на рэйве, абвешчаным падзеяй, прысвечанай “сябрам, каханню і бясконцай свабодзе”. Фестываль праходзіў усяго ў трох кіламетрах ад мяжы з сектарам Газа.

Рэйв кахання і свабоды стаў адной з першых цэляў баевікоў.

Беглі. Проста беглі

Ужо калі ў небе паказаліся ракеты, была абвешчаная чырвоная трывога. Удзельнікі фестывалю не ведалі, куды ісці. Як кажуць некаторыя ў інтэрв'ю The Washington Post, яны былі вельмі стомленыя і ап'янелыя. Спачатку панікі не было. Пакуль не пачалася страляніна.

"Мы пачалі бегчы. Мы не ведалі, куды ісці”, — расказвае ўдзельніца рэйва Бэн Хаім.

Шмат хто пабег да сваіх аўтамабіляў. Але баевікі ўжо блакавалі дарогі, рабілі засады і, як кажуць сведкі, “шнырылі па тэрыторыі ў пошуках людзей, якіх можна было б выкрасці”.

Цяпер там абломкі згарэлых аўтамабіляў. Ізраільскія салдаты і спецыяльныя службы збіраюць целы загінулых у кузаў вялікага грузавіка-рэфрыжэратара, які прыпаркаваны каля кінутых машын.

Да пляцоўкі, адкрытай прасторы на роўным полі, дзе і схавацца няма дзе, прыязджаюць сваякі ўдзельнікаў рэйва, якія зніклі. Сваякі кажуць, што на фестывалі было больш за тысячу чалавек. Некаторыя ўдзельнікі кажуць, што нашмат больш: каля трох-чатырох тысяч.

Забойствы, выкраданні

Бэн Хаім убачыла баевікоў, якія ішлі да пляцоўкі пешшу. Яна ўзяла ключы ад машыны свайго сябра, які быў вельмі п’яны, пасадзіла туды як мага больш людзей і “пачала ездзіць, як вар’ятка”.

“Людзі, якія засталіся, — большасць з іх была выкрадзеная ці забітая”, — кажа яна.

Але ехаць было немагчыма: перакрывалі дарогі ўжо не толькі баевікі, але і машыны з забітымі людзьмі. Гэтыя аўто з ахвярамі ўнутры так і стаялі пасярод дарогі. У выніку група сяброў паспрабавала ўцячы.

“У кожным кірунку, куды б мы ні беглі, у нас стралялі; мы беглі дзве гадзіны, спрабуючы ўцячы. Мы пачалі паўзці па кустах”, — прыгадвае Бэн Хаім.

Хаваючыся, яна з сябрамі спрабавала дазваніцца да паліцыі, але там адказалі, што не могуць дапамагчы, бо выкрадзена занадта шмат людзей. Праз некаторы час ім дапамог мясцовы жыхар, які ездзіў па ваколіцы і спрабаваў выратаваць хоць некага.

Але так пашанцавала не ўсім.

25-гадовая Ноа Аргамані хавалася ў кустах разам са сваім бойфрэндам Авінатанам. Раніцай яны адправілі бацькам Ноа смс, нібыта яны ўжо ў бяспецы, каб супакоіць іх. Але потым сувязь з парай знікла.

Сябры пазналі Ноа і Авінатана на відэа з палесцінскіх паблікаў: дзяўчына крычыць, яе вязуць на байку. Хлопца са звязанымі рукамі некуды вядуць.

Потым яны знайшлі яшчэ адно відэа, дзе Ноа ўжо ў палоне, як і шмат іншых дзяўчат. “Хаця б мы ведаем, што яна жывая”, — кажа сяброўка Ноа.

Яна прыгадвае: Ноа не была ўпэўненая, што хоча на фестываль, бо ехаць ад дома даволі далёка і дорага. “Я сказала: “Ідзі, ты маладая”. Цяпер я шкадую пра гэта”, — дадае сяброўка выкрадзенай дзяўчыны.

Што з Авінатанам, пакуль невядома. Родныя нават не ведаюць, ці жывы ён.

Як мінімум 250 удзельнікаў рэйва цяпер лічацца забітымі. Сотні зніклі — імаверна, яны ў палоне баевікоў.