“Як ты?” Беларуска дапамагае ўкраінцам, а яе дзеці не ведаюць, што ў Кіеве вайна

Шматдзетная маці Марына Кіявец пераганяе з Польшчы машыны для ўкраінскіх вайскоўцаў. Яе малодшыя дзеці не ведаюць, што ў Кіеве, куды раз на месяц ездзіць маці, ідзе вайна.

Калі мы пытаемся пра Украіну, Марына з непакоем паглядвае на незачыненыя дзверы. У суседнім пакоі — яе дзеці.

— Я не кажу ім падрабязнасцяў, каб яны не турбаваліся. Яны дастаткова перажылі, калі бачылі, як мяне затрымліваюць беларускія сілавікі. Але старэйшы… Ён усё разумее.

Марына перачытвае перапіскі з дзецьмі. Калі яна ў дарозе, яны намагаюцца не турбаваць яе лішні раз званкамі, але ўвечары абавязкова спісваюцца: “Люблю вас” — “І мы цябе”.

Каб малодшы сын не баяўся праз маміны паездкі, яна паабяцала яму, што аднойчы абавязкова пакажа Кіеў. Марына не казала, што найперш у Кіеве павінна скончыцца вайна, і цяпер хлопчык чакае гэтага падарожжа.

Гэта другая гісторыя з новай серыі Еўрарадыё “Як ты?”. Беларускія добраахвотнікі і валанцёры ва Украіне паказваюць перапіскі са сваімі блізкімі людзьмі. І распавядаюць нам пра тое, чаго недагаворваюць, калі запэўніваюць сваякоў, што ў іх усё добра.