Якім будзе першы замежны візіт новаабранага прэзідэнта?

Еўрарадыё пацікавілася ў прэтэндэнтаў, куды будзе іх першы візіт у якасці прэзідэнта: Маскву, Брусель ці Вашынгтон? Лідар кампаніі “Гавары праўду!” Уладзімір Някляеў нечаканага адказу не даў. “На Ўсход!” — коратка адказаў ён. Але потым патлумачыў.

Уладзімір Някляеў: “Пры ўсіх размовах пра наш рух на Захад, які для мяне вельмі важны, менавіта ўрэгуляванне тых супярэчнасцяў, што ўзніклі на сённяшні дзень з Расіяй, — ёсць першачарговае знешнеэканамічнае пытанне. Як і знешнепалітычнае”.



Еўрарадыё пацікавілася, ці не выклікана жаданне найперш рушыць на Ўсход і неабходнасцю наведаць тых сяброў, якія фінансава падтрымліваюць кампанію Някляева. Той шчыра прызнаўся, што і гэты складнік прысутнічае. Пасля чаго дадаў, што больш фінансавых аргументаў у БТ супраць “Гавары праўду!” не будзе.

Уладзімір Някляеў: “Пасля таго, як Лукашэнка закрычаў пра нейкія 200 тысяч, якія ён нібыта знайшоў, і рабіў акцэнт, што гэта менавіта грошы Някляева, “Гавары праўду!”, і было адчуванне, што вось-вось пра гэта заявіць і пачнецца працэс над здраднікамі народа, — мы проста больш не займаемся тым, што ездзім і наладжваем кантакты з людзьмі, з якімі звязаныя фінансава. Яны самі ўзялі гэта на сябе”.

У тым, што першы візіт кожнага новаабранага прэзідэнта Беларусі мусіць быць у Маскву, упэўнены і Мікалай Статкевіч.

Мікалай Статкевіч: “Такая сённяшняя эканамічная і палітычная рэальнасць, што беларуская эканоміка падвязаная да расійскай эканомікі. І я думаю, што гэты фактар кожны цвярозы палітык павінен улічваць. Думаю, Брусель не пакрыўдзіцца, калі да іх візіт будзе другі”.



А вось у намесніка старшыні Партыі БНФ прыярытэтаў няма — найперш паедзе туды, куды першым запросяць.

Рыгор Кастусёў: “Хто першы будзе запрашаць — туды і паеду. Але мне хацелася б пабываць і ў Вашынгтоне, і ў Бруселі, і ў Маскве. І хацелася б з усімі сябраваць”.



Яраслаў Раманчук заявіў, што ні ў адну з трох пералічаных сталіц ён адразу не паедзе. Першы візіт будзе ў Канаду, другі — ва Ўкраіну.

Яраслаў Раманчук: “Паедзем у Канаду рабіць мост у "Вялікую дваццатку", а потым паедзем наконт такога ж моста размаўляць з Украінай”.



Наведае Раманчук і Маскву. Але надаваць такому візіту вагу палітычнага прыярытэту ён не хоча.

Бізнесмен Віктар Цярэшчанка заявіў, што сядзе ў самалёт і ў рамках аднаго візіту наведае і Маскву, і Брусель. Але Масква ўсё ж будзе першай.

Віктар Цярэшчанка: “Гэта будзе візіт у Маскву, а потым у Брусель. Сумесныя прапановы, якія ёсць паміж Беларуссю, Расіяй і Еўрасаюзам, — гэта галоўныя пытанні, якія трэба вырашаць”.

А прэтэндэнта ў прэзідэнты ад Беларускай хрысціянскай дэмакратыі Віталя Рымашэўскага найперш цікавяць не Масква ці Брусель, а Вільня і Кіеў. Менавіта туды ён і накіруецца спярша.

Віталь Рымашэўскі: “Гэта будзе адна з суседніх краін, якая знаходзіцца на поўначы альбо на поўдні, — Украіна або Літва. Гэта нашыя суседзі, і нас звязвае і гістарычнае мінулае, і гістарычная будучыня. Я лічу, што трывалая, устойлівая будучыня — у добрых стасунках з блізкімі суседзямі”.



Ніводны з прапанаваных карэспандэнтам Еўрарадыё накірункаў першага візіту не ўразіў і Алеся Міхалевіча.

Алесь Міхалевіч: “Мне б хацелася, каб гэта была Прага. Як краіна, якая робіць для Беларусі вельмі шмат”.



Паводле яго словаў, першы візіт новаабранага прэзідэнта не абавязкова павінен быць у тую краіну, дзе робіцца сусветная палітыка.

Фота: Змітра Лукашука