Юлія Цімашэнка пагадзілася выехаць на лячэнне ў Нямеччыну
Былая кіраўніца ўкраінскага ўраду прыняла прапанову, якую перадалі ёй назіральнікі Еўрапарламента — Пэт Кокс і Аляксандр Квасьнеўскі.
Пра гэта паведамляе ВВС са спасылкай на яе абаронцу Сяргея Уласенку. Таксама, кажа адвакат, кіраўнікі місіі Еўрапарламента Кокс і Квасьнеўскі перадалі прэзідэнту Украіны Віктару Януковічу прашэнне пра памілаванне Юліі Цімашэнкі.
Да 15 кастрычніка Еўрапарламент чакае высноваў місіі. Ад іх можа залежаць падпісанне Дамовы пра асацыяцыю паміж Украінай і ЕС.
Эксперты згадвалі выезд Цімашэнкі на лячэнне за мяжу як адзін з магчымых варыянтаў выйсця для ўкраінскіх уладаў. Еўрапарламент патрабуе адпусціць асуджаную экс-прэм'ерку, а кіраўніцтва Украіны не хоча апраўдваць асуджаную.
Фота — lenta-ua.net
