З барысаўскай раёнкі сышла галоўрэд, якая наракала на праблемы ў горадзе

Галоўная рэдактарка барысаўскай раённай газеты "Адзінства" Кацярына Вараб'ёва звольнілася з пасады. 

23 жніўня яна апублікавала ў Інстаграме фота працоўнай кніжкі і падпісала яго: "Больш не галоўрэд "Адзінства". Таксама Вараб'ёва дадала цытату з верша расійскага паэта Яўгена Еўтушэнкі: "Не надо бояться быть честным, но битым, а надо бояться быть лживым и сытым".

Прычыны звальнення яна не патлумачыла.

На пачатку чэрвеня журналістка дала інтэрв'ю праўладнаму блогеру Аляксею Голікаву і наракала на праблемы Барысава. Яна заявіла, што райцэнтрам надаюць мала ўвагі, што ў Барысаве ніяк не пабудуюць новую паліклініку, а дарогі ў горадзе кепскія.

"Наша Ніва" піша, што пасля гэтага інтэрв'ю ў рэдактаркі "Адзінства" пачаліся праблемы.