З тралейбуса эвакуявалі пасажыраў з-за сумкі, у якой быў рондаль з дранікамі
У Гомелі пасажыраў тралейбуса №5 11 красавіка давялося эвакуяваць. Прычынай стала безгаспадарная сумка, забытая ў салоне, піша БЕЛТА са спасылкай на афіцыйнага прадстаўніка УУС Гомельскага аблвыканкама Віталя Прыстромава.
Падазроную сумку выявілі на прыпынку "вуліца Сялянская" па праспекце Леніна. Пільныя гамельчукі паведамілі пра яе ў міліцыю. На месца здарэння неадкладна прыбыла сапёрная група. Рух па адной паласе праезнай часткі быў спынены, а тэрыторыю вакол самога прыпынку ачапілі.
На шчасце, трывога апынулася фальшывай. У сумцы знаходзіўся рондаль з дранікамі.
