Замах на забойства статыстыкі: як з 3,3% зрабіць 33,4%

Жнівень 2016 года. Кіраўнік дзяржавы прымае з дакладам генпракурора Аляксандра Канюка. Генпракурор звяртае ўвагу на тое, што забойстваў стала менш:

"Што тычыцца крымінагеннай сітуацыі, то ў параўнанні з мінулым годам яна практычна не змянілася. Разам з тым, у якасці станоўчага моманту адзначаецца меншая колькасць забойстваў".

Забойстваў — менш. Гэта мы запомнім...

3 лютага 2017 года. Генпракуратура на калегіі падводзіць злачынныя вынікі 2016 года. Працытуем генпракурора: "... на 3,3% павялічылася колькасць забойстваў".

Такім чынам, у жніўні забойстваў было менш, па выніках года — стала больш.

Статыстыка на сайце Міністэрства ўнутраных спраў пацвярджае: "забойства і замах на забойства" ў 2016 годзе — 437 выпадкаў. Гэта сапраўды на 24 забойствы больш, чым у 2015 годзе ці на 3,3%.

Цяпер сачыце за рукамі... Вось зборнік Белстата па дэмаграфіі, дадзеныя за 2016 год. Нас цікавіць смяротнасць ад забойстваў — загінула 395 чалавек. А ў 2015-м — 296 смерцяў. Як бачым, колькасць забітых (гэта не забойстваў?) на самай справе вырасла на 33,4%. Або на 99 чалавек! А пракуратура і не ведае! У генпракуратуры на 24 забойствы больш. Пракуратура дакладвае сабе і ўсім нам пра нейкія 3,3%.

Як такое можа быць? Ці значыць гэта, што забіваюць маньякі (ахвярамі становяцца некалькі чалавек)?

Справа ў тым, што МУС і Генпракуратура лічаць не забойствы, а забойствы з замахамі. Хоць на выніковай калегіі Генпракуратуры кажуць менавіта пра забойствы.

Цяпер сачыце за рукамі, магчыма, ёсць момант, які не бачыць пракуратура і МУС за гэтымі "некрытычна" 3,3%.

У 2016 годзе 437 выпадкаў забойства і замаху на забойства і 395 ахвяр. Выніковасць — 90%

У 2015 годзе было 296 смерцяў на 423 забойствы і замахаў на забойства. Выніковасць — 70%.

Вы ўпэўненыя, што пракуратура разумее, чаму за год раптам так вырасла колькасць забітых і ўпала колькасць замахаў на забойства? Ці гэта не праблема?

Тады давайце падумаем, што адбылося з беларусамі з 23 жніўня, калі Генпракурор паведаміў прэзідэнту, што ў краіне менш забойстваў, а па выніках года аказваецца, што забіта на 99 чалавек больш. Мяркуючы па ўсім, чатыры месяцы ў краіне арудавалі маньякі?