Жонка Алеся Бяляцкага расказала пра рэакцыю мужа на Нобелеўскую прэмію міру

Алесь Бяляцкі быў моцна ўражаны навіной пра прысуджэнне яму Нобелеўскай прэміі міру, расказала жонка праваабаронцы Наталля Пінчук. Яны змаглі абмеркаваць гэтую падзею толькі падчас спаткання ў СІЗА. І гэта было першае спатканне за паўтара года.

"На спатканні бачна было, што для яго гэта таксама была вельмі нечаканая, але радасная навіна, і ён да гэтага часу не можа прыйсці ў сябе. Ён моцна ўражаны гэтай навіной", — расказала Наталля. Ужо пасля прысуджэння прэміі ад Бяляцкага прыходзілі лісты. Але ніякага намёку на тое, што ён ведае пра прэмію, у іх не было.

Бяляцкі знаходзіцца ў зняволенні ўжо 17 месяцаў. У канцы жніўня праваабаронцы даведаліся, што калегу трымаюць у так званым "спецкалідоры" — паўпадвальным памяшканні з дрэннымі ўмовамі. Па словах жонкі, інфармацыі пра паляпшэнне ўмоў утрымання Алеся ў яе няма.

"Наколькі я зразумела за гэты час, яму наогул забараняюць распавядаць пра ўмовы ўтрымання, пра тое як ідзе следства, выказвацца пра сучасную палітычную сітуацыю і іншае", — кажа Наталля. Паводле яе, за адно-два "лішніх" словы ліст можа быць проста выкінута цэнзарам у сметніцу. Але нават пры гэтым не ўсе лісты выпускаюць на волю. Наталля таксама распавяла, што Алесь выглядае спакойным, і што яна хвалюецца за ягонае здароўе.

Старшыню Праваабарончага цэнтра "Вясна" Алеся Бяляцкага затрымалі ў ліпені 2021 года. Паводле звестак калегаў, яго абвінавачваюць у кантрабандзе (арт.228 КК РБ) і фінансаванні групавых дзеяннях, якія груба парушаюць грамадскі парадак (ч. 2 арт. 342 КК РБ).

Уручэнне прэміі адбудзецца на наступным тыдні — 10 снежня.