Жыхары Драгічына дамагліся, каб тры вуліцы ў горадзе займелі беларускія назвы
Тры праектаваныя вуліцы Драгічына з чатырох атрымалі беларускую тапаніміку ў выніку грамадскага абмеркавання.
Першапачаткова мясцовыя ўлады прапанавалі даць вуліцам назвы "Маскоўская", "Пятра Баграціёна", "Івана Айвазоўскага" і "Георгія Жукава".
Аднак калі праект быў вынесены на абмеркаванне, жыхары Драгічына вырашылі выказаць сваё меркаванне. Усяго людзі накіравалі ў райвыканкам 27 лістоў з 92 варыянтамі назваў, удакладняе мясцовы райвыканкам.
Раней мясцовыя жыхары стварылі петыцыю, дзе прасілі "выбіраць для назваў вуліц у Драгічыне імёны, звязаныя з краем, а не выдзіраць выпадковых людзей з расійскага пантэона".
У выніку са старога спісу застаўся толькі савецкі маршал Жукаў. Вуліца Маскоўская стала Мінскай, Баграціёна — Міхаіла Герасімава (гэта партызан часоў Вялікай Айчыннай), Айвазоўскага — Юрыя Блінова (ураджэнец Драгічына, піяніст, адзін з уладальнікаў клуба "Крумкачы").
Драгічын — старажытны беларускі горад, вядомы з 1452 году. Цяпер гэта раённы цэнтр Брэсцкай вобласці, у якім жыве каля 15 тысяч чалавек.
