"10 тысяч долараў за дзіця? Мо гэта быў экспромт?"

Падчас наведвання завода “БелАЗ” у Жодзіне кіраўнік дзяржавы кажа пра праект “Вялікая сям’я”. Маўляў, за народжаных дзяцей бацькам на адмысловы рахунак будуць налічваць грошы ў валюце!

“Мы зараз думаем, як падтрымаць жанчын. Сем’і як падтрымаць… Вось праект “Вялікая сям’я” мне прапанавалі. За першае дзіця — дзесяць тысяч долараў. Мы ў доларах адкрываем рахунак. За другога — дваццаць. За трэцяга — у два разы павялічваем. А калі яшчэ ты сам на гэты рахунак грошы кладзеш, то мы ў два разы больш даем”, — кажа Аляксандр Лукашэнка.

У Мінскім абласным фондзе сацабароны пра такі праект чулі… па тэлевізары.

 “Чулі, учора і чуў. Але падрабязнасцяў не ведаю — мо гэта быў нейкі экспромт кіраўніка дзяржавы?” — пытаюцца ў Мінскім абласным фондзе сацабароны і раяць тэлефанаваць вышэй.

У фондзе сацабароны пры Мінпрацы пытанню Еўрарадыё пра падрабязнасці праекта чамусьці нервуюцца:

“Ну што, прэзідэнт да нас звяртаўся? Не! Не ведаем мы пра гэты праект нічога”, — і кідаюць слухаўку.

Няма інфармацыі ні ў прэс-службе кіраўніка дзяржавы, ні ў Галоўным ідэалагічным упраўленні.

Але вось БелТА спасылаецца на намесніка старшыні пастаяннай камісіі Палаты прадстаўнікоў па правах чалавека, нацыянальных адносінах і СМІ Тамару Красоўскую.

Паводле дэпутата, праект прадугледжвае адкрыццё рахунку, на які будуць налічвацца грошы за дзяцей. Хоць нехта ў краіне ведае пра “Вялікую сям’ю”!

Еўрарадыё датэлефанавалася да памочніцы Тамары Красоўскай.

"Ніякіх каментароў яна (Тамара Красоўская. — заўв. Еўрарадыё) даваць не будзе. Яна выказала сваё меркаванне, а яе не так зразумелі, і нешта канкрэтнае яна не можа канкрэтызаваць. Пакуль яна не можа даваць ніякіх каментароў па гэтым праекце, бо ён яшчэ не гатовы", — урэшце кажа памочніца Тамары Красоўскай.

І толькі ў Мінфіне Еўрарадыё пацвярджаюць: ведамства сапраўды займаецца механізмамі выплат бацькам. Аднак пра праект, згодна са словамі прэс-сакратара Мінфіна Ірыны Комар, казаць вельмі і вельмі рана. Больш канкрэтная інфармацыя з'явіцца ў канцы кастрычніка. “Дзякуй тым людзям, хто такія праекты прапаноўвае”, — кажа Еўрарадыё ">маці пяцярых дзетак Алена Віктараўна Светнік з Мінска.

Разам з жанчынай падлічваем, колькі грошай ідзе на выхаванне і ўтрыманне немаўля.

“Калі маці сама корміць, ёй трэба харчаванне добрае, а потым падгузнікі ідуць, усялякія гігіенічныя сродкі, сумесі, і гэта без каляскі — мільёны чатыры трэба”, — кажа Алена Віктараўна.

Згодна з дадзенымі Белстата, у студзені-жніўні года ў краiне нарадзілася болей за 78 тысяч дзетак.

Паводле самых сціплых прыкідак давядзецца знайсці 780 мільёнаў долараў.

“10 тысяч долараў за дзіця? Прывабная прапанова!” (гук)