Ачышчэнне ад нелаяльных? Хто з вядомых дэпутатаў "палаткі" не пойдзе на выбары

16/01/2024 - 17:50

Хто не пойдзе на выбары? / @rubanau_collage

16 студзеня пачынаецца рэгістрацыя кандыдатаў у дэпутаты Нацыянальнага сходу Беларусі. Раней Еўрарадыё пісала пра тое, хто з вядомых дзеячаў рэжыму Лукашэнкі збіраецца ўдзельнічаць у парламенцкіх выбарах.

А цяпер мы раскажам пра некаторых дзейных дэпутатаў, якія не захацелі (або ім не дазволілі) паўторна заняць дэпутацкае крэсла і чым яны запомніліся на сваёй пасадзе.

Марыя Васілевіч

Самая маладая асоба ў цяперашняй ніжняй палаце парламента, дэпутатка Марыя Васілевіч, мяркуючы па звестках аб ініцыятыўных групах па зборы подпісаў, не будзе балатавацца на другі тэрмін.

У 2019 годзе, ва ўзросце 22 гадоў, дзяўчына стала дэпутаткай пры дапамозе Лукашэнкі, нават нягледзячы на тое, што тагачасная кіраўніца ЦВК Лідзія Ярмошына крытыкавала Васілевіч і казала, што ёй няма з чым ісці да народа.

Замежныя СМІ пісалі, што Васілевіч атрымала гэтае месца на падставе інтымнай сувязі з Лукашэнкам. Але дзяўчына папракнула прэсу ў хлусні і заявіла, што журналісты павінны несці адказнасць за свае публікацыі.

Пасля пратэстаў 2020 года яна наведала ў бальніцы пратэстоўцаў, якія пацярпелі ад рук сілавікоў.
— Я як прадстаўнік дзяржаўнай улады — хоць, можа, і не маючы на тое паўнамоцтваў — прыносіла прабачэнні людзям за нанесеныя ім траўмы.

У сваіх сацсетках падчас масавых акцый пратэсту прасіла бакі прымірыцца і спыніць гвалт.

Таксама заяўляла, што не выказвалася аб пазбаўленні грамадзянства беларусаў.

У Палаце прадстаўнікоў займаецца прасоўваннем закона аб адказным абыходжанні з жывёламі.

Уладзімір Андрэйчанка

Спікер ніжняй палаты парламента Уладзімір Андрэйчанка таксама вырашыў не балатавацца на свой ужо пяты тэрмін.
Зараз яму 75 гадоў. У палітыцы ён яшчэ з часоў СССР. З 1994-га па 2008-ы займаў пасаду старшыні Віцебскага аблвыканкама, быў членам Савета Рэспублікі. З 2008 года і па цяперашні час з'яўляецца старшынёй Палаты прадстаўнікоў.

Андрэйчанка адзін з тых, каму Лукашэнка па-сапраўднаму давярае. Яны знаёмыя яшчэ з часоў працы ў Вярхоўным Савеце Беларусі ў 90-гады.

Напрыклад, у чэрвені мінулага года ён лётаў замест Лукашэнкі ў Турцыю на інаўгурацыю Рэджэпа Таіпа Эрдагана. А ў снежні на сустрэчы ў Маскве ўдзельнічаў у абмеркаванні міжпарламенцкага супрацоўніцтва са спікерамі парламентаў непрызнаных Абхазіі і Паўднёвай Асеціі.

У 2022 годзе здзіўляўся нарошчванню войскаў NATO уздоўж межаў Беларусі і запэўніваў, што "праводзячы міралюбівы замежнапалітычны курс, нашы краіны нікому ніколі не пагражалі і не збіраюцца гэтага рабіць і надалей".

Андрэй Савіных

Былы дыпламат, надзвычайны і паўнамоцны пасол Беларусі ў Турцыі і Іраку, займае дэпутацкую пасаду з 2019 года. На будучыя выбары сваёй заяўкі не падаваў.

Неаднаразова выступаў з крытыкай краін Захаду. Выказваў меркаванне нібыта заходнія кампаніі падштурхнулі Расію да пачатку вайны.

Падчас пратэстаў 2020 года заявіў Парламенцкай асамблеі АБСЕ, што "праваахоўныя органы рэагавалі ў адпаведнасці з законам". Акрамя гэтага, раскрытыкаваў рэзалюцыю Еўрапарламента аб непрызнанні вынікаў прэзідэнцкіх выбараў: "відавочная праява сістэмнага крызісу, у якім знаходзяцца ўсе еўрапейскія інстытуты".

А ў 2021 годзе прапанаваў беларускім айцішнікам зрабіць выбар: ці працаваць на беларускую эканоміку, ці эміграваць у іншыя краіны.

Дарэчы, у кастрычніку папярэдняга года высветлілася, што яго дачка ўжо доўгі час жыве і працуе ў Лондане, а таксама мае брытанскае грамадзянства.

Валерый Варанецкі

Адзін з самых неадназначных беларускіх дэпутатаў Валерый Варанецкі пасля двух тэрмінаў таксама вырашыў не выстаўляцца на выбары.

Будучы дыпламатам, у розныя гады працаваў у Расіі і Бельгіі. Быў паслом у Аўстрыі, Харватыі і Славакіі.
У 2018 годзе станоўча выказваўся пра БНР, заяўляў, што яе абвяшчэнне — значная падзея ў гісторыі беларускага народа.

Падчас акцый пратэстаў 2020 года казаў пра неабходнасць даць прававую ацэнку фактам здзекаў і гвалту над людзьмі, а таксама аб прыцягненні да адказнасці вінаватых.

У сваім профілі на Facebook Варанецкі выказаўся пра смерць рамана Бандарэнкі ў 2020 годзе: "Боль, смутак і жальба. Гвалт мусіць быць спынены! Закон і справядлівасць — адноўленыя!"

Акрамя гэтага, дэпутат выступіў асабістым паручальнікам для вызвалення журналісткі TUT.BY Алены Талкачовай. За гэта яго абавязалі выплаціць 500 базавых велічынь (18,5 тыс. рублёў) штрафу.

Лілія Ананіч

Былая міністарка інфармацыі Беларусі Лілія Ананіч пасля аднаго дэпутацкага тэрміну таксама не выказала жадання рэгістраваць ініцыятыўную групу.

Па сваёй працы ў "палатцы" запомнілася кіраўніцтвам камісіяй па выяўленні экстрэмізму. За 2021-2022 гады выявіла 1379 праяў экстрэмізму і рэабілітацыі нацызму.

У пачатку 2023 года займалася распрацоўкай паправак у закон аб СМІ і расказала, што новаўвядзенні звязаныя з абаронай інфаполя ў перыяд электаральных кампаній.

"Супраць нашай краіны фактычна вядзецца неабвешчаная гібрыдная вайна. Пры гэтым калектыўны Захад выкарыстоўвае ўвесь арсенал дэструктыўнага інфармацыйна-псіхалагічнага ўздзеяння на асобу, грамадства, дзяржаву" — казала Ананіч.

Месяц таму ўдзельнічала ў форуме, прысвечаным памяці Ахмата Кадырава, першага прэзідэнта Чачэнскай Рэспублікі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.